الماتىنىڭ ناۋرىزباي اۋدانىندا حيميا-بيولوگيا باعىتىنداعى نازارباەۆ زياتكەرلىك مەكتەبى ەسىگىن ايقارا اشتى. جاڭا ءبىلىم ورداسىنىڭ اشىلۋ سالتاناتىنا قالانىڭ جاڭا اكىمى باۋىرجان بايبەك قاتىستى، دەپ حابارلايدى ۆNews.kz.  بۇل - كولەمى جاعىنان ەلىمىز بويىنشا ەڭ ۇلكەن مەكتەپ.

مەكتەپ عيماراتى 960 ورىنعا شاقتالعان. ءبىلىم وشاعىنىڭ 9 بلوگىندا 70 وقۋ سىنىبى مەن زاماناۋي جابدىقپەن جاراقتاندىرىلعان 25 زەرتحانا بار. نازارباەۆ زياتكەرلىك مەكتەبىندە وقۋشىلارعا كونكۋرستىق ىرىكتەۋدەن وتكەن ەلىمىزدىڭ 140-تان استام ۇزدىك وقىتۋشىسى ساباق بەرەدى. 

«جاڭا مەكتەپتە بارلىق جاعداي جاسالعان. سىزدەرگە تىلەرىم، ساباقتارىڭدى جاقسى وقىپ، ەشتەڭەدەن قورىقپاڭدار. ادامنىڭ قولىنان كەلمەيتىن ءىس جوق، ەڭ باستىسى شىن نيەتپەن قالاۋ كەرەك. ءبىلىم العان جاقسى، الايدا تاربيەسىز بەرىلگەن ءبىلىمنىڭ بەرەر پايداسى جوق. ءبىر جاعىنان، سىزدەر ءبىر-بىرىڭمەن باسەكەلەسسىڭدەر، ەكىنشى جاعىنان – دوسسىزدار»، - دەيدى الماتى اكىمى باۋىرجان بايبەك.

بۇل ءبىلىم ورداسىنىڭ وزگە زياتكەرلىك مەكتەپتەردەن ايىرماشىلىعى، مۇندا ءتۇرلى باعىتتاعى تەحنيكالىق ۇيىرمەلەر جۇمىس ىستەيتىن زەرتحانا-تەحنوتوريا بار. قالقامان-2 شاعىن اۋدانىنىڭ وقۋشىلارى وسى ۇيىرمەلەرگە قاتىسىپ، ءبىلىمىن شىڭداي الدى. 

اباي-اقپارات