تالعات ەرمەگياەۆ زاڭسىز سىياقى ەسەبىندە 4,2 ملرد. تەڭگە كولەمىندە قارجى الدى دەپ ايىپتالۋدا. 

 بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا قر مەملەكەتتىك قىزمەت جانە سىبايلاس جەمقورلىققا قارسى ءىس-قيمىل اگەنتتىگىنىڭ اپپارات باسشىسى ايگۇل شايىموۆا ءمالىم ەتتى.

«تالعات ەرمەگياەۆ «استانا ەكسپو-2017» ۇلتتىق كومپانياسىنىڭ بىرقاتار لاۋازىمدى تۇلعالارىمەن جانە مەردىگەر كومپانيالارىنىڭ باسشىلارىمەن بىرگە اسا ءىرى كولەمدە اقشا جىمقىردى دەپ كۇدىكتەلۋدە. قازىرگى ۋاقىتتا تەرگەۋ امالدارى كەزىندە ەرمەگياەۆ جىمقىرىلعان قاراجاتتىڭ ىشىنەن زاڭسىز سىياقى ەسەبىندە 4,2 ملرد. تەڭگە كولەمىندە قارجى العان. قازىر كەزدە 10 ادام قاماۋعا الىندى»، - دەپ اتاپ ءوتتى شايىموۆا.

تالعات ەرمەگياەۆ قر قك 176-بابىنىڭ 4-تارماعى بويىنشا (وزگەنىڭ مۇلكىن جىمقىرۋ) كۇدىكتى رەتىندە تانىلىپ وتىر. قازىرگى ۋاقىتتا سوتقا دەيىنگى تەرگەۋ امالدارى جۇرگىزىلۋدە.

ەسكە سالا كەتەيىك، بۇدان بۇرىن «استانا ەكسپو-2017» قۇرىلىس دەپارتامەنتىنىڭ بۇرىنعى ديرەكتورى قاجىمۇرات ۇسەنوۆ ۇستالىپ، ۇيقاماققا الىنعان بولاتىن.

11 ماۋسىمدا مەملەكەت باسشىسى نۇرسۇلتان نازارباەۆتىڭ وكىمىمەن تالعات امانگەلدىۇلى ەرمەگياەۆ «استانا ەكسپو-2017» ۇلتتىق كومپانياسى» اكتسيونەرلىك قوعامىنىڭ باسقارما توراعاسى قىزمەتىنەن بوساتىلدى. كەيىننەن قاماۋعا الىنىپ، بارلىق مۇلىكتەرى تاركىلەندى. «استانا ەكسپو-2017» ۇك» اق باسقارما توراعاسى لاۋازىمىنا ەلوردا اكىمى ادىلبەك جاقسىبەكوۆ تاعايىندالدى. 

19 ماسىمدا، «استانا ەكسپو-2017» اق باسقارۋشى ديرەكتورى سۋلامبەك باركينحوەۆ ۇستالدى. وعان بۇعان دەيىن ۇستالعان كومپانيانىڭ باسشى تۇلعالارىمەن بىرگە ءسوز بايلاسىپ، 214 ميلليون تەڭگە بيۋدجەت قاراجاتىن جالعان كاسىپكەرلىك ارقىلى قولما قول اقشاعا اينالدىرىپ يەلەنۋ جانە ىسىراپ ەتۋ تۋرالى كۇدىك كەلتىرىلگەن.

سونداي-اق، «استانا ەكسپو-2017» ۇلتتىق كومپانياسى باسقارما مۇشەلەرىنىڭ ءبىرى ۆەرا كوباليا 11 شىلدەدە كەنەتتەن جۇمىسىنان كەتتى.  ازىرگە، ونىڭ نەگە قىزمەتتەن كەتكەنى تۋرالى ناقتى اقپارات جوق.

اباي-اقپارات