بۇگىن قر پارلامەنتى سەناتىنىڭ جالپى وتىرىسىندا جوعارعى پالاتا دەپۋتاتتارى ءماجىلىس ماقۇلداعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە زەينەتاقىمەن قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكى وقىلىمدا قاراستىرىپ، قابىلدادى.  BNews.kz-ءتىڭ حابارلاۋىنشا، زاڭ جوباسىندا زەينەتاقى جۇيەسىنە قاتىسۋ وتىلىنە بايلانىستى بازالىق زەينەتاقى تاعايىنداۋ ءتارتىبى 2017 جىلدىڭ 1 شىلدەسىنەن باستاپ وزگەرەتىن بولادى.

«بازالىق زەينەتاقى ازاماتتار زەينەتكەرلىك جاسقا جەتكەن كەزدە عانا جانە زەينەتاقى جۇيەسىنە قاتىسۋ وتىلىنە بايلانىستى تاعايىندالادى. زەينەتاقى جۇيەسىنە قاتىسۋ ءوتىلى 10 جىلدان از جانە ەڭبەك ءوتىلى بولماعان جاعدايدا بازالىق زەينەتاقىنىڭ مولشەرى ەڭ تومەن كۇنكورىس دەڭگەيىنىڭ 50%-ىنا تەڭ بولادى. 10 جىلدان ارتىق ەڭبەك وتىلىندە ءاربىر جىل ءۇشىن 2%-عا ارتىپ وتىرادى. بىراق، ەڭبەك ءوتىلى 35 جانە ودان دا كوپ جىل بولعان جاعدايدا زەينەتاقى ەڭ تومەنگى كۇنكورىس دەڭگەيىنىڭ 100%-نان اسپاۋى ءتيىس»،-دەدى بايانداما جاساعان قر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا. 

بۇدان باسقا، بازالىق زەينەتاقىنى تاعايىنداۋ ساياساتىنىڭ وزگەرۋىنە بايلانىستى جاسى بويىنشا بەرىلەتىن مەملەكەتتىك الەۋمەتتىك جاردەماقىلار الىنىپ تاستالدى. 
سونىمەن قاتار، اسكەري قىزمەتكەرلەردى، ياعني، الەۋەتتى قۇرىلىمدارداعى قىزمەتكەرلەردى زەينەتاقىمەن قامسىزداندىرۋ 2016 جىلدىڭ 1 قاڭتارىنان باستاپ مەملەكەتتىك بيۋدجەت ەسەبىنەن جۇزەگە اسىرىلادى. 

اباي-اقپارات