وزبەك وعىنان ايدىڭ امانىندا ارىستاي ازاماتىمىزدىڭ قاتارى بىرەۋگە سيرەپ، ارتىندا جەتى جەتىم بالاسى قالعانى تۋرالى كەشە جازعان ەدىك.

قازاق قوعامىنىڭ نارازىلىعىن تۋدىرعان اتالعان جاعدايعا ەلىمىزدىڭ سىرتقى ىستەر مينيسترلىگى دە بەيجاي قارامادى. ءۋاليحان احمەتوۆتىڭ قازاسىن مۇقيات تەرگەۋدى تالاپ ەتكەن سىرتقى ىستەر مينيسترلىگىنىڭ وكىلى التاي ابيبۋللاەۆ رەسمي تۇردە مىناداي مالىمدەمە جاساعان بولاتىن:

"28 ماۋسىم كۇنى تۇنگى ۋاقىتتا قازاقستان ازاماتى ءۋاليحان احمەتوۆ وق اتاتىن قارۋدان جاراقات الىپ، قازا تاپتى. احمەتوۆتىڭ دوستارىنا، تۋىستارى مەن جاقىندارىنا كوڭىل ايتامىز. ءبىز نارازىلىق ءبىلدىرىپ، قازاقستان ازاماتىنا قارسى بەيبىت زاماندا قارۋ قولدانۋ قازاقستان مەن وزبەكستان اراسىنداعى باۋىرلاستىققا، ستراتەگيالىق قارىم-قاتىناسقا قارسى نارسە ەكەنىن اتاپ وتەمىز. سوندىقتان دا ءبىز وقيعانى مۇقيات جانە جان-جاقتى تەرگەۋدى تالاپ ەتەمىز. سونىمەن قاتار، وزبەكستان شەكاراسىن كەسىپ ءوتتى دەلىنىپ وتىرعان قازاقستان ازاماتىنا وق اتۋ اقىلعا قونىمسىز ءىس. وزبەكستان تاراپىنان ءبىز ءىستى مۇقيات تەرگەپ، كىنالىلەردى جازاعا تارتۋلارىن سۇرايمىز".

وسىعان ساي، تاشكەنتتەگى قازاقستان ەلشىلىگى نوتانى وزبەكستان سىرتقى ىستەر مينيسترلىگىنە جىبەردى. قازاقستاننىڭ سىرتقى ىستەر مينيسترلىگىنە دە قازاقستانداعى وزبەكستان ەلشىسى  شاقىرىلىپ،  وعان دا نوتا تاپسىرىلعان ەدى.

ءوز كەزەگىندە وزبەكستان بيلىگى وڭتۇستىك قازاقستان وبلىسىنداعى شەكارالىق ايماقتا قازاق ازاماتىن اتىپ ولتىرىلۋىنە بايلانىستى رەسمي تۇردە مالىمدەمە جاسادى. وزبەكستان ۇلتتىق قاۋىپسىزدىگى قىزمەتى مەملەكەتتىك شەكارانى قورعاۋ كوميتەتى سىرداريا وزەنىنىڭ جاعالاۋىنداعى قازاق-وزبەك شەكاراسىندا زاڭ بۇزۋشىلىق ورىن الىپ، ناتيجەسىندە قارۋ قولدانۋ سالدارىنان قازاق ازاماتىنىڭ مەرت بولعاندىعىن مالىمدەدى.

«اعىمداعى جىلدىڭ 28 ماۋسىمىندا وزبەكستان مەملەكەتتىك شەكاراسىن قورعاۋ قىزمەتكەرلەرى №178 شەكارالىق اۋدان ايماعىندا شەكارانى زاڭسىز كەسىپ ءوتۋ فاكتىسىن تىركەگەن. شەكارانى زاڭسىز كەسىپ ءوتۋشى ەكى ازاماتقا قارسى قارۋ قولدانىلىپ، سالدارىنان ونىڭ ءبىرى جاراقات العان. شەكارا قىزمەتى اپپاراتىنىڭ ماماندارىمەن وتكىزىلگەن جيىن بارىسىندا قازاقستان ازاماتتارىنىڭ شەكارانى زاڭسىز كەسىپ وتكەنى راستالىپ، تالقىلاندى» - دەلىنگەن رەسمي حابارلامادا.

سونىمەن قاتار، وزبەك بيلىگى ءوز مالىمدەمەلەرىندە قازاق ارىپتەستەرىنىڭ قىزمەتتىك جۇمىستارىنا قاتىستى سىن-ەسكەرتپەلەرىن دە جاريالاعان.

ء«بىز قازاقستاندىق ارىپتەستەرىمىزگە قازاق-وزبەك شەكاراسىن كەسىپ وتۋشىلەر مەن سونىڭ ماڭىندا تۇراتىن ازاماتتارعا زاڭسىز كەسىپ وتپەۋ ماسەلەسىنە وراي ءتۇسىندىرۋ جۇمىستارىن جۇرگىزۋگە شاقىرامىز» دەيدى ولار.

ال، قازا بولعان قازاق ازاماتىنىڭ دوسى شەكارانى مۇلدە كەسىپ وتپەگەنىن، ءتىپتى، وزبەكستان شەكاراشىلارى ەشقانداي ەسكەرتۋسىز-اق وق جاۋدىرعانىن ايتقان ەدى. ء سىم وكىلى مالىمدەۋىنشە مارقۇمنىڭ دوسى زارداپ شەكپەگەن، قازىرگى كەزدە ول قۇقىق قورعاۋ ورگاندارىنا جاۋاپ بەرىپ جاتىر.

ءبىز، سىرتقى ىستەر مينيسترلىگى ءوزى «اقىلعا قونىمسىز ءىس» دەپ باعالاعان قاندى وقيعانىڭ انىعىنا جەتىپ، قىلمىستى تاراپتى جازاعا تارتادى دەپ سەنەمىز.

Abai.kz