Bloomberg اگەنتتىگىنە سۇحبات بەرگەن ۇلتتىق بانكىنىڭ باسشىسى قايرات كەلىمبەتوۆ: «قازىرگى كەزدە قازاقستاندى ورتالىق ازياداعى ەكىنشى سينگاپۋر دەپ سانايدى. بىزدە بۇرىنعى كەڭەستىك رەسپۋبليكالار ەلدەرىنىڭ اراسىندا ەڭ باسەكەگە قابىلەتتى ەكونوميكا بار» دەگەن.

ول سۇحباتىندا، «قازاقستان جاڭا اقشا ساياساتىنا كوشتى. بەكىتىلگەن قاتاڭ ۆاليۋتا باعامىنان ورالىمدى باعامعا كوشۋگە تىرىسۋدا. بۇل ۇدەرىس ورتاشا ەسەپپەن 5 جىلدى الادى»، - دەي كەلە،  قازاقستانداعى ۇلتتىق بانكتىڭ جۇمىس باعىتتارىنىڭ ءبىرى استانادا حالىقارالىق قارجى ورتالىعىن دامىتۋ ەكەنىن اتاپ وتكەن.

Bloomberg - كاسىبي قارجى نارىقتارى قاتىسۋشىلارى ءۇشىن جەتەكشى قارجى اقپاراتىن ەكى جەتكىزۋشىنىڭ ءبىرى. نەگىزگى ءونىمى - Bloomberg Terminal, ول ارقىلى بارلىق الەمدىك بيرجالاردىڭ، بيرجادان تىس نارىقتاردىڭ دەرلىك اعىمداعى جانە تاريحي باعالارىنا، Bloomberg اگەنتتىگىنىڭ جاڭالىقتار لەنتاسىنا جانە باسقا دا جەتەكشى بۇقارالىق اقپارات قۇرالدارىنا، وبليگاتسيالار مەن باسقا دا باعالى قاعازدارعا، ەلەكتروندىق ساۋدا جۇيەسىنە قول جەتكىزۋگە بولادى. اگەنتتىكتىڭ ارنايى تەلەارنالارى، جۋرنالدارى، سايتتارى، ۇيالى قوندىرعىلارى جانە ءوز راديوسى بار.

اباي-اقپارات