تاۋەلسىز مەملەكەتتىگىمىزدى قالىپتاستىرۋ جولىنداعى ايتۋلى بەلەس - قازاق حاندىعىنىڭ 550 جىلدىعى مەرەكەسىنە ەلىمىزدىڭ ستراتەگيالىق ارىپتەسى رەسەي مەملەكەتى ايرىقشا ماڭىز بەرىپ وتىر. بۇل تۋرالى رەسەي فەدەرالدىق كەڭەستىڭ حالىقارالىق ىستەر بويىنشا كوميتەتى باسشىسىنىڭ ورىنباسارى اندرەي كليموۆ «نۇر وتان» پارتياسى دەلەگاتسياسىمەن كەزدەسۋ بارىسىندا مالىمدەدى.

ساياسي، ەكونوميكالىق جانە مادەني بايلانىستارى تەرەڭنەن تامىر تارتقان قوس ەل قارىم-قاتىناسىنىڭ جەتىستىكتەرىنە توقتالعان ا.كليموۆ  قازاقستاندىق ارىپتەستەرىن بيىلعى جىلى ەلىمىز اتاپ ءوتىپ جاتقان ايتۋلى مەرەكەلەرمەن قۇتتىقتاي كەلە:

«قازاق حاندىعىنىڭ 550 جىلدىعى قازاقستان حالقىنىڭ تاريحىنداعى ماڭىزدى كەزەڭى بولىپ تابىلادى. وسىناۋ وقيعانى نازاردان تىس قالدىرماۋ ماسەلەسىن ءبىز سىزدەرمەن بىرلەسىپ ويلاستىرۋىمىز قاجەت»، - دەدى ول.

سونداي-اق، رەسەي پارلامەنتشىلەرى اتاۋلى كۇندەردى مەرەكەلەۋ  بويىنشا  بىرلەسىپ جۇمىس جاساۋدىڭ قاجەت ەكەنىن جەتكىزدى، ولاردىڭ قاتارىندا جەڭىستىڭ 70 جىلدىعى دا بار.

ەسكە سالا كەتەيىك، 23 ماۋسىمدا «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەكتىڭ باسشىلىعىمەن پارتيا دەلەگاتسياسىنىڭ رەسەي فەدەراتسياسىنا رەسمي ساپارى باستالدى.

ساپار بارىسىندا ماسكەۋدە «ەدينايا روسسيا» بۇكىلرەسەيلىك ساياسي پارتياسىنىڭ باستاماسىمەن ەكى ەلدىڭ بيلەۋشى پارتيالارىنىڭ اراسىنداعى ءوزارا ءىس-قيمىل مەن ارىپتەستىك تۋرالى كەلىسىمگە قول قويىلدى.

اباي-اقپارات