تۇڭعىش پرەزيدەنت كۇنى وڭتۇستىك قازاقستان مەملەكەتتىك  پەداگوگيكالىق ينستيتۋتىندا وتكەن مادەني شارالاردا دارىپتەلدى. بۇل تۋرالى Abai.kz  سايتى «شىمكەنت كەلبەتى» گازەتىنە سىلتەمە جاساي وتىرىپ حابارلايدى.

وقۋ ورنىندا وتكەن بارلىق مەرەكەلىك ءىس-شارا بارىسىندا جاستار قازاقستاننىڭ تۇڭعىش پرەزيدەنتى ن.نازارباەۆتىڭ: ء«بىزدىڭ قاسيەتتى جەرىمىز ەجەلدەن ۇلى دالا، ال ءبىزدى ۇلى دالانىڭ پەرزەنتتەرى دەپ اتاعان» دەگەن ۇلاعاتتى ءسوزىن جازىلعان شىعارمالارىنان اڭعارتتى. سۋرەتشىلەر، قولونەر شەبەرلەرى بايقاۋىنا، اقىندار ءمۇشايراسىنا، ايتىسقا قاتىسقان جاس دارىنداردىڭ بارلىعى ەلىمىزدىڭ بۇگىنگى تىنىس-تىرشىلىگىن، جەتىستەرى مەن جارقىن بولاشاعىن، بىرلىگى مەن بەرەكەسىن مەملەكەت باسشىنىڭ ەڭبەگىمەن بايلانىستىردى. وسىلايشا تۇڭعىش پرەزيدەنت تۋرالى تانىمدارىنىڭ تەرەڭدىگىن ءبىلدىردى.

وقۋ ورداسىنداعى العاشقى ءىس-شارا «ۇلى دالا ەلىنىڭ تاريحي بەلەستەرى» اتتى وبلىستىق جاس سۋرەتشىلەر بايقاۋىمەن اشىلدى. جوعارى وقۋ ورىندارى جانە ارناۋلى ورتا وقۋ ورىندارىنىڭ ستۋدەنتتەرى دە باق سىناعان بايقاۋدا اۋەسقوي قىلقالام شەبەرلەرىنىڭ تۋىندىلارى قويىلدى. مۇنداعى ۇمىتكەرلەردىڭ شىعارمالارىنا قاراساڭىز، ارقايسىسىنىڭ الدىنا وي تولعايدى. سوندىقتان ونەرلى سۋرەتشىنى انىقتاۋ وڭايعا سوقپادى.

– ۇمىتكەرلەرگە قاتاڭ تالاپ قويىلعان جوق. فانتازياسى مەن يدەياسىن شەكتەمەدىك. ويتكەنى ءاربىر قاتىسۋشى ءوزىنىڭ ويىنشا ۇلى دالا ەلىن قالاي كورەدى؟ كوز الدىنا قالاي ەلەستەتەدى؟ بايقاۋدا ونەرلى جاستاردىڭ ەڭبەكتەرىنە قاراپ سۇيسىندىك. وسىنداي يگى ىستەردى ءاردايىم قولداپ، ۇيىمداستىرىپ تۇرامىز دەگەن ويدامىز، – دەيدى بايقاۋدى ۇيىمداستىرۋشىلار.

بايقاۋ قورىتىندىسى بويىنشا ۇزدىكتەرگە باعالى سىيلىقتار مەن العىس حاتتار تابىستالدى. سونداي-اق، «ۇلى دالا ەلىنىڭ» شەبەرلەرى اتتى وبلىستىق قولونەر بايقاۋى دا جوعارى دەڭگەيدە ۇيىمداستىرىلدى. بايقاۋعا شەبەر جاستار تابيعي تاستار مەن اشەكەيلەر توپتاماسىن، قولونەر بۇيىمدارىن ۇسىندى. اسىرەسە، قازىلار القاسىن ۇلتتىق ناقىشتاعى بۇيىمدار قىزىقتىردى.

ءبىلىم مەن عىلىمنىڭ ورداسى بولعان وقۋ ورنىندا تۇڭعىش پرەزيدەنت كۇنىنە ارنالعان ءۇشىنشى شارا دا ماڭىزدى. وقمپي تاربيە ىستەرى جونىندەگى پرورەكتورى اقليما مارحاباتقىزىنىڭ قولداۋىمەن، فيلولوگيا فاكۋلتەتىنىڭ دەكانى ف.ع.ك ناريمان جۇماشۇلىنىڭ، قازاق جانە الەم ادەبيەتى كافەدراسىنىڭ مەڭگەرۋشىسى ف.ع.ك.، مامىت التىبايۇلىنىڭ باسشىلىعىمەن جاس اقىندار ءمۇشايراسى ءوتتى. جازبا اقىندار اراسىندا وتكەن جىر دوداسىنا جوعارى جانە ارناۋلى وقۋ ورىندارىنان 32 اقىن ستۋدەنت قاتىستى. سايىستا جاستار ەكى ولەڭنەن وقىدى. ءبىرىنشى كەزەڭدە - ۇلى ىستەردىڭ ۇيىتقىسى –ۇلى دالا ەلى جايىندا دەربەستىگىمىز دارىپتەلسە، ەكىنشى كەزەڭ ەركىن تاقىرىپقا ارنالدى.

– ءبىزدىڭ ءمۇشايرامىزدىڭ ماقساتى پوەزيانى كوركەمدەپ وقۋ ەمەس، اقىننىڭ مىقتىلىعىن، قابىلەت-قارىمىن انىقتاۋ. سوندىقتان جاستاردىڭ تاقىرىپتى اشىپ، ءوزىنىڭ قابىلەتىن كورسەتۋگە مۇمكىندىگى مول. تۇڭعىش پرەزيدەنت كۇنىنە وراي وتكىزىلگەن ءمۇشايرا وڭتۇستىكتە جالىنداعان جاس اقىنداردىڭ ءوسىپ كەلە جاتقانىن بايقاتتى، – دەيدى ايتىسكەر اقىن، قازىلار القاسىنىڭ مۇشەسى انار جاپپارقۇلوۆا.

ءمۇشايرا قورىتىندىسى بويىنشا باس جۇلدەنى وڭتۇستىك قازاقستان مەملەكەتتىك پەداگوگيكالىق ينستيتۋتىنىڭ 2 كۋرس ستۋدەنتى لاۋرا سارمانوۆا جەڭىپ الدى.

1 ورىن ەلىمىزدىڭ جەتىستىكتەرىن جىر شۋماقتارىمەن جەتكىزگەن وتىرار اۋدانى ت. يبراگيموۆ اتىنداعى ورتا مەكتەپتىڭ مۇعالىمى داۋرەن پولاتباەۆقا بەرىلدى. ال ەكىنشى ورىنداردى م. اۋەزوۆ اتىنداعى وقمۋ-ءنىڭ 1 كۋرس ستۋدەنتى رەنا تابىلحان مەن

ق. ا. ياساۋي اتىنداعى حقتۋ-فيلولوگيا فاكۋلتەتىنىڭ 3 كۋرس ستۋدەنتى نارقۇلان رايحانۇلىنا بۇيىردى. ءۇشىنشى ورىندى جوعارى جانە ارناۋلى وقۋ ورىندارىنىڭ ستۋدەنتتەرى يەلەندى. جەڭىمپازدار ديپلومدارمەن ماراپاتتالىپ، العىس حاتتارعا يە بولدى.

«ۇلى دالا ەلى» اندەرى جاس ورىنداۋشىلار بايقاۋى دا مەرەكەنىڭ ءمانىن اشا ءتۇستى. جەرگىلىكتى ونەر يەلەرى بايقاۋدىڭ لايىقتى جەڭىمپازدارىن انىقتادى.

ەڭ تارتىستى وتكەن «ەلىن سۇيگەن، ەلى سۇيگەن ەلباسى» اتتى وبلىستىق جاس اقىندار ايتىسى بولدى. جىر دوداسىنا 4 جۇپ اقىن قاتىستى. ايتىستى بەلگىلى ايتىس اقىنى ءبىرجان بايتۋوۆ جۇرگىزدى. تاۋەلسىزدىك جىلدارىنداعى قول جەتكىزگەن قۇندىلىقتاردى ناسيحاتتاعان جاستار ۇتىمدى ۇيقاسىمەن، ۇتقىر ويىمەن كورەرمەندى ءتانتى ەتتى. اسىرەسە ايان نيازبەك پەن شىمكەنتتىك قاجىمۇقان ابزالوۆتىڭ تاپقىرلىعىنا كوپشىلىك ءجيى قول سوعىپ وتىردى. ۇلتتىق ونەرىمىزدى وركەندەتۋگە ۇلەس قوسقان شاراعا وقو قۇرمەتتى ازاماتى، بەلگىلى ايتىسكەر اقىن اسەلحان قالىبەكوۆا قازىلىق جاساعان بولاتىن.

– جاستاردىڭ ايتىسى جامان بولعان جوق. مەن قاتىسۋشىلار اراسىنان سەرىك جۇمادىلدەن ءۇمىت كۇتىپ ەدىم.

سايرامدىق جاندوس مىرزابەك تە ۇتقىرلىعىمەن كوزگە ءتۇستى. ال قاجىمۇقان ابزالوۆ، داۋرەن ىسقاق شاۋىپ جۇرگەن جۇيرىكتەر. دەگەنمەن ولارعا ءالى دە تىنىسى اشىلۋى ءۇشىن ءبىراز ەڭبەك ەتۋى كەرەك. ايان نيازبەك پەن بايدىبەكتىك نۇرلىبەك مەيىرمانوۆتىڭ ايتىسى جاقسى بولدى، – دەدى اسەلحان قالىبەكوۆا.

ايتىستىڭ باس جۇلدەسىن ايان نيازبەككە وڭتۇستىك قازاقستان مەملەكەتتىك پەداگوگيكالىق ينستيتۋتىنىڭ رەكتورى وڭالباي اياشەۆ تابىس ەتتى. 1 ورىن قاجىمۇقان ابزالوۆقا بۇيىرسا، 2 ورىندى نۇرلىبەك مەيىرمانوۆ جەڭىپ الدى. 3 ورىندى داۋرەن اقساقالوۆ يەلەندى.

مەملەكەت جانە قوعام قايراتكەرى، فيلولوگيا عىلىمدارىنىڭ دوكتورى، پروفەسسور مىرزاتاي جولداسبەكوۆتىڭ جاستارمەن كەزدەسۋى «رۋحاني مۇرا جانە ماڭگىلىك ەل يدەياسى» اتتى تاقىرىبىندا ءوتتى. جۇرەككە جىلى نۇر قۇياتىن سۇحبات قىزىقتى بولدى. جاستار اكادەميككە سۇراقتارىن قويىپ، تولىمدى جاۋاپ الدى.

– «تاۋەلسىزدىكتىڭ سىزدەرگە بەرگەنى وزدەرىڭىز ويلاعاننان دا كوبىرەك. ءبىز – وتكەن بۋىننىڭ، كەڭەستىك كەزەڭنىڭ ادامدارى كەشەگى مەن بۇگىنگى كۇننىڭ ايىرماشىلىعىن ناقتى اجىراتا الامىز. بالا كەزىمىزدە ءبىز وقۋدى ارماندايتىنبىز، بىراق، مۇعالىمدەر بولمادى. بۇگىندە سىزدەرگە مول جاعداي جاسالعان: ينتەرنەت، ەلەكتروندى ءبىلىم الۋ، زاماناۋي سىنىپتار مەن زەرتحانالار. مۇنىڭ ءبارىن باعالاۋعا جانە ودان ءارى دامىتۋعا ۇيرەنۋ كەرەك. ال تاۋەلسىز مەملەكەتتى قۇرعان تۇڭعىش پرەزيدەنت ن. نازارباەۆتىڭ تاريحي ءرولى مەن ورنى بولەك» – دەدى م.جولداسبەكوۆ.

مەرەكە قارساڭىنداعى ءىس-شارالار «ەلباسى بىزگە ونەگە:سپورت-جان سۇلۋلىعى» اتتى سپورتتىق جارىستارمەن (باسكەتبول، ۆولەيۆول، شاحماتتان بليتستۋرنير) جالعاستى.

جاستاردى ەلىن، جەرىن سۇيۋگە شاقىراتىن ءىس-شارالار ولاردىڭ وتانسۇيگىشتىك سەزىمىن ۇيالاتۋعا ايتارلىقتاي ۇلەس قوساتىنى انىق. بۇگىنگى كۇنى ءبىلىم مەن عىلىمنىڭ ورداسىنا اينالعان وقۋ ورنىندا بارلىق جاعداي جاسالعان. تاعىلىم الاتىن سان الۋان جۇمىستار اتقارىلىپ جاتىر. تۇڭعىش پرەزيدەنت كۇنىنە ارنالعان ءىس-شارالار اپتا سوڭىنا دەيىن جالعاسىپ، 7 مەرەكەلىك بايقاۋ قورىتىندىلانادى.

Abai.kz