تۇڭعىش پرەزيدەنت كۇنىندە ەلوردامىز استانا مەن الماتى قالاسىندا جاڭاجىلدىق شىرشالار جاعىلدى، - دەپ حابارلايدى «اباي» پورتالى.

بيىل ەلىمىزدىڭ باس پارتياسى "نۇر وتاننىڭ" بەلسەندىلەرى تاۋەلسىزدىك كۇنىنە دەيىن شىرشا ورناتپاۋ جونىندە باستاما كوتەرىپ، شاپقىلاعان بولاتىن. ولار جەلتوقسان ايى كەلمەي جاتىپ، ورىستىڭ جاڭا جىلىنا شابىلاتىن شەندىلەردى  مىنەپ، تۇڭعىش پرەزيدەنت كۇنى مەن تاۋەلىزدىك مەرەكەسىنە قۇرمەت كورسەتپەيتىندەردى تەزگە سالماق بولدى.

بىراق، امال نە؟ ءبىرىنشى جەلتوقسان ەسىگىمىزدەن سىعالاي سالا استانا مەن الماتى قالالارى جاڭا جىلدىق شىرشالاردى جارق ەتكىزدى. ولار بۇل ىسپەن نەنى دالەلدەگىسى كەلەدى؟ تاۋەلسىزدىك مەيرامىن پىسقىرمايدى-مىس، ەڭ قۇرىعاندا تۇڭعىش پرەزيدەنت كۇنى مەرەكەسى وتكەنشە سابىر ساقتاۋعا بولماس پا ەدى؟ باسقا كۇنى ەمەس، ءدال وسى كۇنى شىرشا ورناتۋدىڭ استارىندا نە جاتىر؟ 

مەنىڭ تۇسىنبەيتىن ءبىر نارسەم بار... ءبىزدىڭ اكىمدەر نەگە شىرشا جارىعىن جاعۋعا قۇمار؟ ولار قاقاعان قاڭتاردىڭ، ياعني كەلەر جىلدىڭ كەلە جاتقانىن اي بۇرىن "سۇيىنشىلەمەسە" ول مەيرام كەلمەي قويا ما ەكەن؟ ميلليوندارعا باعالاناتىن سول شىرشاعا كەتەتىن قارجىنى باسقا ماقساتتارعا، يگىلىكتى ىستەرگە جۇمساساق بولماس پا ەدى؟

الىپ قالالار مەن وبلىس ورتالىقتارىنداعى شىرشالاردىڭ ورتاشا قۇنى 40 ميلليونعا باعالانادى ەكەن. سول 40 ميلليوندىق شىرشا ورناتاتىن  14 وبلىس پەن ەكى ءىرى قالامىز شامامەن 640 ميلليون تەڭگەنى (ۇساق قالالار مەن اۋدان ورتالىقتارىن ەسەپتەمەگەندە) جەلگە ۇشىرادى دەگەن ءسوز. 

ءبىز جەلگە ۇشقان ول اقشانى جوقتاپ وتىرعان جوقپىز. تەك وزگە ايماقتار تۇڭعىش پرەزيدەنت كۇنى مەن تاۋەلسىزدىك مەرەكەسىن قۇرمەتتەۋدى استانا مەن الماتى اكىمدەرىنەن ۇيرەنەتىنىن ايتقىمىز كەلەدى.

"بالىق باسىنان ءشىريدى" دەگەن ءسوز بار. "باسىمىزدىڭ" سيقى مىناۋ بولسا، جەتىسكەن ەكەنبىز...

ءشارىپحان قايسار

Abai.kz