قازاقستان ۇلتتىق تەلەارناسىنان «قاراشاڭىراق» دەگەن سەريالدى قايتالاپ كورسەتتى. ارينە، كينوعا قوياتىن كىنام جوق، ول بىرەۋگە ۇناسا، بىرەۋگە ۇناماۋى مۇمكىن. بىراق كينونىڭ اتىن «قاراشاڭىراق» دەۋى دۇرىس ەمەس. قازاق اكەسىنىڭ ءۇيىن «ۇلكەن ءۇي»، «قارىشاڭىراق»، كەيدە «كارىشاڭىراق» دەپ اتايدى. ال، بولەك شىققان بالاسىنىڭ ءۇيىن «جاس وتاۋ»، «وتاۋ» دەپ اتاعان.
قازاقتىڭ اعاش ۇيىندە قاراعا بويالعان بۇيىم جوق. شاڭىراق كوك، ۋىق، كەرەگەلەر قىزىل بولادى. قازاقتا قارا شاڭىراق بولمايدى. ماڭعىستاۋ قازاقتىڭ سالت-ءداستۇرىنىڭ قايماعى بۇزىلماعان ايماق بولسا، سول ماڭعىستاۋدىڭ قارىشاڭىراعى – ماڭعىستاۋ اۋدانى. سول اۋدان تۇرعىندارى اكەسىنىڭ ءۇيىن ءالى كۇنگە دەيىن «ۇلكەن ءۇي» نەمەسە «قارىشاڭىراعىمىز» دەپ اتايدى. 
قازاق «قارا» ءسوزىن كوپ قولدانا بەرمەگەن، تەك ءىس ارەكەتى قاتە بولعان ادامداردىڭ اتىنا «قارا» ءسوزىن قوسىپ ايتاتىن بولعان. «ادايدىڭ ءۇش قاراسى» دەگەن اتاۋ سودان قالعان. قازاق قارا كيىم كيمەگەن، «قارانى جامانشىلىق شاقىرادى» دەپ ساناعان. «قاراشال»، «قارابالا»، «قاراكەمپىر» دەگەن دە جاقسى جاعدايدا ايتىلماعان. 
ال، «شاڭىراق» قازاقتىڭ جەتى قازىناسىنىڭ ءبىرى. قازاق شاڭىراقتى قارا دەپ اتامايدى. تەك قانا ادامى قايتىس بولعان جاعدايدا «قارا جامىلعان شاڭىراق قوي» دەگەن. بۇرىنعى اتالارىمىزدىڭ جىرلارىن قاعازعا تۇسىرگەندە «قارى»، ءسوزى «قارا» بولىپ جازىلىپ كەتۋى مۇمكىن!.. قازىرگى ءبىزدىڭ «قاراشاڭىراق» دەپ جۇرگەنىمىز سودان قالسا كەرەك. ارينە، بۇل تەك مەنىڭ جەكە پىكىرىم عانا، اقيقاتىن تالداپ كورىڭىز.

جانىبەك قوجىق

Facebook-تەگى پاراقشاسىنان