جاقىندا قازاقستاندىق باق-تا تۇركيا تەرريتورياسىندا اپاتقا ۇشىراعان رەسەيلىك سۋ-24 اسكەري ۇشاعىنىڭ كومانديرى ولەگ پەشكوۆ (قازا تاپقان ۇشقىش) وسكەمەن قالاسىندا تۇرعان دەگەن اقپارات جاريالاندى.  حالىقارالىق تالاپتاردى ەسكەرمەي، بوتەن مەملەكەتتىڭ اۋماعىنا ءوتىپ كەتكەن، كەيىن تۇركيا قارۋلى كۇشتەرىنىڭ شابۋىلىنان قازا بولعان ولەگ پەشكوۆ ءتالىم العان وسكەمەندەگى №29-مەكتەپتە بەلسەندىلەر ميتينگ ۇيىمداستىرماققا ۇمتىلدى.

ال جەرگىلىكتى بيلىك پەن قۇزىرلى مەكەمەلەر شەرۋدى كەيىنگە شەگەرگەن. بۇل تۋرالى   «NewTimes.kz» سايتى جازدى.

قازا بولعان اسكەريدىڭ قۇرمەتىنە شەرۋ ۇيىمداستىرماق بولدى دەگەن سىبىس باق-تا تاراعاننان كەيىن، newtimes.kz» اگەنتتىگىنىڭ ءتىلشىسى وسكەمەن قالاسىنداعى №29-مەكتەپ اكىمشىلىگىنە حابارلاستى. ونداعىلار: «ميتينگ وتكىزۋگە رۇقسات بەرىلگەن جوق. قالالىق ءبىلىم باسقارماسىنا حابارلاسىڭىزدار» دەپ،  «newtimes.kz» اگەنتتىگىنىڭ تىلشىسىنە وسكەمەن قالالىق ءبىلىم باسقارماسىنا قوڭىراۋ سوعۋىن ءوتىنىپتى.

ءوز كەزەگىندە وسكەمەن قالالىق ءبىلىم باسقارماسى جەرگىلىكتى بيلىك ورگاندارى ەشقانداي ميتينگ وتكىزۋگە رۇقسات بەرمەگەنىن ايتقان (http://newtimes.kz/obshchestvo/item/22738-miting-v-pamyat-o-pogibshem-pilote-su-24-otmenen-v-ust-kamenogorske).

«كەشە اتالعان مەكتەپ ديرەكتورىنىڭ بۇل باستاماسىنا قاتىستى ۇلكەن تالقىلاۋ بولدى. ال بۇگىن قالالىق ءبىلىم باسقارماسىنىڭ ماماندارى №29-مەكتەپتى تەكسەرۋگە باردى.  قالالىق باسقارما ەشقانداي شەرۋ، ميتينگى ۇيىمداستىرۋعا رۇقسات بەرگەن جوق»،- دەپ جاۋاپ بەرىپتى  سايت تىلشىسىنە ءبىلىم باسقارماسىنىڭ باس مامانى لاۋرا كازەكەشوۆا.

ەستەرىڭىزگە سالا كەتەيىك، جاقىندا وسكەمەن قالاسىنداعى №29-مەكتەپ ديرەكتورىنىڭ ورىنباسارى تاراتقان مالىمەتتەر بويىنشا، قازاقستاندىق باق-تا اتالعان مەكتەپتە رەسەي ۇكىمەتىنىڭ تاپسىرماسىن ورىنداۋ ءۇشىن تۇركيا اۋماعىندا قازا بولعان ولەگ پەشكوۆتىڭ قۇرمەتىنە شەرۋ ۇيىمداستىرماق بولعان دەگەن اقپارات تاراعان ەدى (http://newtimes.kz/eshche/regiony/item/22704-pogibshij-pilot-sbitogo-turtsiej-su-24-okazalsya-urozhentsem-vko).

رف قارۋلى كۇشتەرىنىڭ قىزمەتكەرى ولەگ پەشكوۆ 1970 جىلى التاي ايماعىنداعى كوسيحا ەلدى-مەكەنىندە دۇنيەگە كەلگەن. 1972 جىلى پەشكوۆتار وتباسى قازاقستانىڭ وسكەمەن  قالاسىنا قونىس اۋدارعان.

ايتا كەتەيىك، قازىردىڭ وزىندە قازا بولعان ۇشقىش ولەگ پەشكوۆقا رف پرەزيدەنتىنىڭ ارنايى جارلىعىمەن، رف حالىق قاھارمانى اتاعى بەرىلدى.

ال رەسەيلىك بەلسەندىلەر پەشكوۆتار وتباسى تۇراتىن ليپەتسك قالاسىنداعى كوشەلەردىڭ بىرىنە ۇشقىشتىڭ ەسىمىن بەرۋدى ۇسىنعان (http://lenta.ru/news/2015/11/25/lipetsk/).

ەستەرىڭىزدە بولسا، 24-قاراشا كۇنى تۇركيا تەرريتورياسىنا زاڭسىز ءوتىپ كەتكەن رەسەيلىك اسكەري ۇشاقتى تۇركيا  قارۋلى كۇشتەرى 10-ەسكەرتۋدەن كەيىن اتىپ تۇسىرگەن (http://abai.kz/post/view?id=5628).

نۇرگەلدى ابدىعانيۇلى

Abai.kz