قۇرمەتتى استانا تۇرعىندارى مەن قوناقتارى، سىزدەر «بايتەرەكتىڭ» ماڭايىنداعى گۇلدى-گۇلدى، الەم-جالەم بويالعان اتتاردى بايقاعان شىعارسىزدار. ءتورت-بەس جاستاعى بالالارعا دۇكەننەن ساتىپ اپەرەتىن ويىنشىق اتتار دەيىن دەسەم، تۇلعاسى شىن اتتاردىكىندەي، بىراق تۇستەرىنەن كوز ۇيالادى.

ءبىزدىڭ قازاق جىلقىنى نەگىزىنەن تەك تۇسىمەن اتاعان. مىسالى، تايبۋرىل، بايشۇبار، كەرقۇلا، قاراقاسقا جانە ت.ب. وكىنىشكە وراي، بۇگىن دالا قازاعى بولماسا، قالا قازاعى جيرەن، قۇلا كەر، بۋرىل دەگەن جىلقى تۇستەرىن ءدوپ باسىپ ايتا المايتىن قالگە جەتكەن.

شىركىن، «بايتەرەكتىڭ» قاسىنداعى ويىنشىق اتتاردىڭ ورنىنا ءوزىمىزدىڭ حالىق اۋىز ادەبيەتىندەگى تۇلپارلار تۇرسا عوي. اتا-انالار بالالارىن ەرتىپ كەلىپ، مىناۋ الپامىستىڭ بايشۇبارى، مىناۋ قوبىلاندىنىڭ تايبۋرىلى، مىنا تۇرعان قامباردىڭ قاراقاسقاسى دەپ ارالاتىپ جۇرسە عوي. ەكسپو-عا كەلگەندەر دە مىناۋ قازاق دەگەن رۋحاني باي، تامىرى تەرەڭ، رۋحى بيىك، وتكەنىن قاتتى قاستەرلەيتىن  حالىق ەكەن دەپ تاڭ قالار ەدى.

ال، ەندى وسى شارۋانى جۇزەگە اسىرۋ مۇمكىن بە؟

ارينە، مۇمكىن!

ءبىز مادەني مۇرا باعدارلاماسى اياسىندا ءجۇز تومدىق «بابالار ءسوزىن» شىعاردىق. ەندى سول باي مۇرانى سورەلەرگە كىتاپ قىلىپ جيناپ قويماي، سۋرەتكە اينالدىرىپ بالانىڭ قولىنداعى ەلەكتروندى قۇرالدارعا  اكەپ سالۋ كەرەك. ءار تۇلپاردىڭ كىتاپتا سيپاتتاماسى بار، سونى تاۋىپ سۋرەتشىلەرگە بەرىپ، قازىلار القاسىن قۇرىپ بىرنەشە سۋرەتشىنىڭ ىشىنەن بىرەۋىنىڭ سالعانىن تاڭداپ بەكىتىپ قويسا، ءبارىمىز كەز كەلگەن بىرىزدەنگەن كەيىپكەردى بالانىڭ وقۋلىعىنان، مۋلتفيلمنەن، جارنامالىق اقپاراتتاردان، كوشەدەگى مۇسىندەردەن كورسەك، جازباي تانىر ەدىك...

(كومپيۋتەرلىك ويىنداردىڭ العاشقى كەيىپكەرى. "قوبىلاندى باتىر")

باتىستىڭ يديولوگتارى قولدان باستارى ءۇشبۇرىشتى، ءتورتبۇرىشتى كەيىپكەرلەر جاساپ، بالامىزدىڭ ساناسىن ۋلاپ جاتقاندا، اتا-بابام قالدىرعان مول مۇرانى ۇقساتا الماي وتىرعانىمىز جاراماس دەپ ىسكە كىرىسىپ كەتسەك، بۇل  5-6 ايدا از عانا قارجىمەن بىتەتىن شارۋا.  جاقىندا ءبىلىم جانە عىلىم  مينيسترلىگىنەن (بعم) باتىرلار تۋرالى كومپيۋتەرلىك ويىندار جاساۋعا 72 (جەتپىس ەكى) ميلليون تەڭگە ءبولىندى دەگەندى وقىدىم. كىمدەر ەكەن دەپ ىزدەپ بارىپ جولىقتىم، اتتاردى تۇستەپ بەرمەك تۇرماق، قازاق تىلىنەن مۇلدەم ماقۇرىم بىرەۋلەر ەكەن. الدىمەن مىنا شارۋا جاسالماعاندىقتان ولار دا كەندەبايدىڭ كەرىسىن اق قىلىپ، قوبىلاندىنىڭ بۋىرىلىن قارا ءتۇستى ەتىپ جاسايتىنى بەلگىلى. سوسىن تاعى دا دالاعا كەتكەن قايران اقشا بولادى دا قويادى.

ءشارىپحان قايسار

Abai.kz