رەسەيلىك «ماتچ تۆ» ارناسىنىڭ تۇساۋكەسەرىنە ارنالعان جيىندا كراسنودار ولكەسى قازاقستاننىڭ ايماعى رەتىندە كورسەتىلدى.

بۇل تۋرالى Vesti.kz-كە سىلتەمە جاساپ NUR.KZ حابارلايدى.

تەلەارنانىڭ پرەزەنتاتسياسى بارىسىندا “گازپروم-مەديا حولدينگ” ديرەكتورلار كەڭەسىنىڭ توراعاسى دميتري چەرنىشەنكو جاڭا ارنانىڭ تارالاتىن ايماقتارى جازىلعان كارتانى كورسەتتى. الايدا، اتالعان كارتادا كوپتەگەن قالالار ءوز ورىندارىنان «قوزعالىپ» كەتكەن.

كارتادا ماسكەۋ سامارا مەن ساراتوۆ اراسىندا ورنالاسسا، قازاندى اۆتورلار ومبى جاققا ىعىستىرىپ جىبەرىپتى. كراسنويارسك كىزىل جانە يركۋتسك اراسىنداعى كىشىگىرىم اۋدانعا جايعاسسا، كراسنودار قازاقستانعا «كوشكەن». اۆتورلار كراسنودار ايماعىن كاسپي تەڭىزىنىڭ شىعىس جاعالاۋىنا ورنالاستىرىپتى.

سونداي-اق، اتالعان كارتادا پاريج گەرمانيانىڭ وڭتۇستىگىندە، ميۋنحەن پولشادا دەپ كورسەتىلگەن.

اباي-اقپارات