كوبىمىزدىڭ كوڭىلىمىزدە جۇرگەن كوپ سۇراقتىڭ ءبىرى: وبلىس اكىمدەرى قايدا تۇرادى؟ ءبىر بىلەتىنىمىز جوعارعى شەندى اكىمدەر ءۇشىن مەملەكەتتىك رەزيدەنتسيالار بار. ال، اتالعان «قورعان - سارايلار» مەملەكەتتىك بيۋدجەتتەن قارجىلاندىرىلا ما، الدە، ولاردىڭ  بار شىعىنى اكىم مىرزالاردىڭ قالتاسىنان  وتەلە مە؟ ءتىپتى، كەيبىر دەرەككوزدەرىنە سۇيەنسەك، وسىنداي رەزيدەنتسيالاردىڭ مەملەكەتكە ايتارلىقتاي بورىشى دا بار - مىس.

informburo.kz سايتىنىڭ اقپاراتتارىنا سۇيەنسەك، وقو، سقو، بقو، ماڭعىستاۋ، قاراعاندى، قىزىلوردا جانە اقتوبە وبلىستارىندا اكىمدەرگە ارنالعان ارنايى  مەملەكەتتىك رەزيدەنتسيالار جوق ەكەن. ال قىزىلوردا وبلىسى اكىمىنىڭ ءباسپاسوز قىزمەتىنىڭ ايتۋىنشا، قىرىمبەك ەلەۋۇلى اتالعان وبلىستىڭ تۋماسى بولعاندىقتان، اكە-شەشەسىنەن مۇراعا قالعان ءوز ۇيىندە تۇرادى. اقمولا جانە شىعىس قازاقستان  وبلىستارىندا دا مۇنداي رەزيدەنتسيالار جوق دەيدى اكىمدىكتەگىلەر. ال وبلىس باسشىلارى مەملەكەتتىك تۇرعىن ءۇي باعدارلاماسى بويىنشا بەرىلگەن جەكە باسپاناسىندا تۇرادى ەكەن. اكىم مىرزالار كوممۋنالدىق جانە وزگە دە شىعىنداردى ءوز جالاقىسىنان تولەيدى. سەندىك، بۇعان دا.

ەندى قاي اكىم قايدا تۇارتىنىن شولىپ كورەيىك.

 پاۆلودار وبلىسى

پاۆلودار وبلىسىنىڭ اكىمى قانات بوزىمباەۆ مىرزا تەرگەۋ جۇمىستارىنىڭ اياقتالماعانىن جەلەۋ ەتە وتىرىپ، جۋرناليستەردىڭ ساۋالىنا جاۋاپ بەرۋدەن باس تارتقان ەكەن. دەسە دە، قانات مىرزانىڭ رەزيدەنتسياسى كەنجەكول اۋىلىندا ورنالاسقانى ءمالىم بولدى. ءمالىم بولماي  قايتسىن؟! بۇل اناۋ-مىناۋ ەمەس، اتى شۋلى رەزيدەنتسيا عوي.  انەۋ ءبىر الەۋمەتتىك جەلىگە كەڭىنەن تارالىپ كەتكەن بەينە روليكتەگى رەزيدەنتسيا وسى كىسىگە تيەسىلى. اكىم مىرزا مەن ونىڭ بالاسىن بوپسالاعاندار ءىسى ءالى تۇيىندەلمەگەن سوڭ قانات بوزىمباەۆ تا رەزيدەنتسيا تۋرالى اقپارات بەرۋدەن باس تارتسا كەرەك. تۇسىنىستىكپەن قارايىق، وعان دا. دەگەنمەن، سپۋتنيكتەن تۇسىرىلگەن مىنا ءبىر سۋرەتتە قانات مىرزانىڭ «اق ءۇيى» مەملەكەت باسشىسىنىڭ رەسمي رەزيدەنتسياسىنىڭ ءدال قاسىندا ورنالاسقانى كورسەتىلگەن. ءتىپتى، بىرنەشە تۇرمىستىق عيماراتتار مەن تەننيس كوردى جانە تىكۇشاق الاڭشاسى دا سالىنعان ەكەن:

 الماتى وبلىسى

 ال، الماتى وبلىسى اكىمى اماندىق باتالوۆ مىرزانىڭ ءباسپاسوز قىزمەتى ءبىر دەگەننەن تالدىقورعان قالاسىندا رەزيدەنتسيا بار ەكەنىن ايتىپ بەرگەن. ايتپاقشى، اماندىق مىرزانىڭ «اق سارايى» وبلىستىق بيۋدجەت ەسەبىنەن قامتاماسىز ەتىلەدى ەكەن. جىلىنا 12 ميلليون تەڭگە جەرگىلىكتى بيۋدجەتتەن وسى ءبىر رەزيدەنتسيانى ۇستاپ تۇرۋعا بولىنەدى. بىراق، بۇل رەزيدەنتسيادا قانداي دا ءبىر مەرەكەلىك شارالار نەمەسە جەكە باسقا قاتىستى كەشتەر وتكىزۋگە تىيىم سالىنعان.

ال اكىم مىرزانىڭ اپپارات باسشىلىعىنىڭ ايتۋىنشا، بۇل سارايدى كۇزەتۋشىلەر ءۇشىن جالاقىنى مەملەكەت تولەمەيدى. سونداي-اق، وبلىس اكىمى بۇل رەزيدەنتسيادا كوپ ۋاقىت بولمايتىندىقتان، عيمارات تەك رەسمي شارالارعا ارنالعان. ال كوممۋنالدىق شىعىندار ورتاشا ەسەپپەن جىلىنا 451 400 تەڭگەنى قۇرايدى.

 الماتى قالاسى

الماتى قالالىق اكىمشىلىگىندەگىلەر دە قالادا رەزيدەنتسيا بار ەكەنىن ايتقان. «الماتى قالاسىنداعى رەزيدەنتسيا رەسپۋبليكا الاڭىنىڭ ماڭىندا ورنالاسقان. عيمارات جەرگىلىكتى بيۋدجەتتەن قارجىلاندىرىلادى. بۇل رەسمي رەزيدەنتسيا بولعاندىقتان اۋلادا مەرەكەلىك شارالار وتكىزىلمەيدى»،-دەيدى اكىمدىكتەگىلەر.

 جامبىل وبلىسى

مۇنداي رەزيدەنتسيا تاراز قالاسىندا دا بار بولىپ شىقتى. ول دا مەملەكەت قازىناسىنان قارجىلاندىرىلادى.

 اتىراۋ وبلىسى

ال اتىراۋ وبلىسى اكىمىنىڭ ءباسپاسوز قىزمەتىنىڭ حابارلاۋىنشا، وبلىس اكىمىنىڭ رەزيدەنتسياسى تۋرالى سوڭعى كەزدەرى ءجيى جازىپ جاتقاندىعىن ايتىپ، قانداي دا ءبىر اقپارات بەرۋدەن باس تارتقان.

 ءتۇيىن: اكىمدەردىڭ كوپشىلىگى وتىرىكتى شىنداي، شىندى قۇداي ۇرعانداي ەتىپ سويلەيتىنىن بۇگىندە ەكىنىڭ ءبىرى بىلەدى. راس، قوي. ولار سەندىرەدى. بىراق،  شىندىقتى ايتارعا كوپ اكىمنىڭ باتىلى جەتپەيدى.  اسىرەسە، قانشا جالاقى الاتىنى مەن قايدا تۇراتىنى تۋرالى لاجى بولسا جاق اشپاۋعا بەيىم. بىراق، ءبىز جوعارىدا مىسالعا كەلتىرگەن اكىمدەر مەملەكەت ەسەبىنەن قارجىلاندىرىلاتىن ۇيلەردە تۇراتىنىن مويىندادى.  اق ساراي، قىمبات كولىك، قارا كوزىلدىرىك  پەن ءتاۋىر كيىم تالاي اكىمنىڭ بۇگىنگى كەلبەتى. سىرتقا سىر الدىرماۋدىڭ سىرى بۇل. ولار رەزيدەنتسيالاردا، جايلى ۇيلەردە تۇرادى. ولار قالا كوشەلەرىندەگى كەپتەلىستەردى كەسىپ وتەدى. سەبەبى، «سوپروۆوجدەنياسى»  بار. اۋىل-قىستاق تۇرعىندارىنىڭ حال-جايىنان دا حابارى شامالى. ولاردىڭ ادەتكى الەۋمەتتىك تۇرمىستى بايقاي بەرمەيتىنى دە سوندىقتان...

 نۇرگەلدى ابدىعانيۇلى

اbai.kz