قاراعاندى وبلىستىق سوتىندا سەرىك احمەتوۆ پەن وبلىستىق بىرقاتار جوعارى لاۋازىمدى شەنەۋنىكتەرىنە قاتىستى قوزعالعان قىلمىستىق ءىس بويىنشا كۋاگەرلەردەن جاۋاپ الۋ جالعاسۋدا. بۇگىن تۇسكە دەيىن سوتقا جاۋاپ بەرگەن «مەتاللۋرگيا-مەتالل وڭدەۋ» يندۋستريالدىق پاركى» (بۇدان ءارى قىسقارتىلعان اتاۋى - مميپ) جشس-ءنىڭ بۇرىنعى قىزمەتكەرى دەميد سماگين اتالعان فيرما باسشىلارىنىڭ ءوزى قاتىسپاعان جينالىسقا «قاتىستىرىپ»، «بايانداماشى ەتىپ»، حاتتاماعا جالعان قولىن قويعانىن اشىق ايتتى. قىلمىستىق ءىستى تەرگەۋ كەزىندە ول كاناليزاتسيالىق تازالاۋ جۇيەسىنىڭ قۇرىلىسى بويىنشا سۋ تازالاۋداعى چەح تەحنولوگياسىن «Eco-treatment systems» جشس-ءنىڭ تەحنولوگياسىنا اۋىستىرۋعا قاتىستى 2011 جىلدىڭ 22 جەلتوقسانىندا جاسالعان «مميپ» جشس-ءى حاتتاماسىنىڭ كوشىرمەسىمەن تانىسىپ، جاعاسىن ۇستايدى.

«ەشقانداي جينالىسقا قاتىسپاسام دا، وسى حاتتامادا مەنى بايانداماشى دەپ كورسەتىپتى. اتالعان ماسەلە بويىنشا جينالىس وتكىزىلگەنىن ماعان و. ايمەنبەتوۆ، ر. گۋزىر، ە. اسانوۆ، ا. بايتىمبەتوۆ، گ. بەلەنكي، ج. احاشەۆ، ا. ەسسە جانە باسقالار ايتقان جوق. مەن ول جەردە ەشقانداي بايانداما جاساعان ەمەسپىن. جانە حاتتاماعا دا قولىمدى قويعان جوقپىن. الگى حاتتاماداعى مەنىڭ قولىمدى بەلگىسىز بىرەۋلەر ادەيى جاساعان»،- دەدى ول سوتتاعى جاۋابىندا. كاناليزاتسيالىق تازالاۋ جۇيەسىنىڭ قۇرىلىسىنا وراي ول مىناداي تۇسىنىك بەردى: «بۇل جوبا بويىنشا «مميپ» جشس-ءى تاپسىرىس بەرۋشى بولىپ تابىلادى. ونى سالۋعا رەسپۋبليكالىق بيۋدجەتتەن قاراجات ءبولىندى. شامامەن العاندا 2010 جىلدىڭ جازىندا ءبىزدىڭ فيرماعا «تسسك نس» جشس-ىنەن چەحيادا جاسالعان سۋ تازالاۋ تەحنولوگياسىن باسقا وندىرۋشىلەردىڭ، سونىڭ ىشىندە «Eco-treatment systems» جشس-ءنىڭ تەحنولوگياسىنا اۋىستىرۋ مۇمكىندىكتەرىن قاراستىرۋدى ۇسىنعان حات كەلىپ ءتۇستى. نەگە ەكەنىن بىلمەدىم، سول كەزدە «مميپ» جشس-ءنىڭ ديرەكتورىنىڭ ورىنباسارى قىزمەتىن اتقاراتىن و. ايمەنبەتوۆ بۇل ۇسىنىستى بىردەن قۇپتادى».

و. ايمەنبەتوۆكە دەيىن «مميپ» جشس-ءنىڭ ديرەكتورىنىڭ ورىنباسارى بولعان د. سماگين تەحنولوگيالىق جابدىقتاردى اۋىستىرۋعا قاجەتتىلىكتىڭ جوعىن بايقاعانىن ايتتى. ونىڭ ۇستىنە چەحيادا جاسالعان سۋ تازالاۋ تەحنولوگياسى مەملەكەتتىك ساراپتامادان ءوتىپ قويىپتى. ونى جوبالاعان «ساۋلەت» جشس-ءنىڭ ماماندارى چەحياعا بارىپ، ەۋروپالىق تاجىريبەمەن تولىق تانىسقان. الايدا سماگين «مميپ» جشس-ءنىڭ ءبىرىنشى باسشىسى ا. ەسسەنىڭ تاپسىرماسىمەن «قازگەرقۇرىلىس» جشس-ءنىڭ جابدىقتاردى اۋىستىرۋ جونىندەگى ۇسىنىسىن «ساۋلەتكە» جولدايدى. سايىپ كەلگەندە، «ساۋلەتتىڭ» ماماندارى «قازگەرقۇرىلىس» پەن «تسسك نس» جشس-ءنىڭ قۇجاتتارىنا تالداۋ جاساپ، بىرقاتار ۇيلەسىمسىزدىكتەردى انىقتايدى. سونىڭ ناتيجەسىندە ولار دا چەحيالىق جابدىقتى باسقاسىمەن اۋىستىرۋعا ەشقانداي قاجەتتىلىكتىڭ جوعىن جازباشا جەتكىزەدى.

الايدا سول كەزدەگى قاراعاندى وبلىسىنىڭ اكىمى سەرىك احمەتوۆتىڭ قولى قويىلعان حات تەحنولوگيالىق جابدىقتاردى اۋىستىرۋ ماسەلەسىن قايتادان قاراۋعا نەگىز بولعان. «2011 جىلدىڭ 1 قاراشاسىندا مەنىڭ ورنىما «مميپ» جشس-ءنىڭ ديرەكتورىنىڭ ورىنباسارلىعىنا بۇرىن «تسسك نس» جشس-ىندە جۇمىس ىستەگەن و. ايمەنبەتوۆ تاعايىندالدى. مەنىڭشە، ول اتالعان نىساندار بويىنشا اتقارىلعان جۇمىستار جونىندەگى اكتىلەرگە قول قويۋ جانە اقشا اۋدارۋدى جۇزەگە اسىرۋ ءۇشىن ادەيى تاعايىندالعان بولۋى كەرەك. ا. ەسسەنىڭ وعان بارلىق قۇزىرەتتەردى (سونىڭ ىشىندە اقشا اۋدارۋ قىزمەتى دە بار) بەرەتىن ارنايى سەنىمحات جازىپ بەرۋى وسىعان دالەل سياقتى»،- دەپ ءتۇسىندىردى ءىستىڭ اق-قاراسىن كۋاگەر. ال وبلىس اكىمىنىڭ قولى قويىلعان حاتتىڭ ەكى ءتۇرلى ء(بىرى باسپا ارىپتەرمەن، ەكىنشىسى قولمەن جازىلعان) نۇسقاسىنىڭ تابىلعانى سوتتاعىلاردى قاتتى تاڭ قالدىردى.  

ءامينا باكىر

اباي-اقپارات