پۋتين اسادپەن كەزدەستى
سەيسەنبى، كەشكە ماسكەۋدە رەسەي پرەزيدەنتى ۆلاديمير پۋتين مەن سيريا پرەزيدەنتى باشار اساد كەلىسسوز جۇرگىزدى. ءپۋتيننىڭ ءباسپاسوز حاتشىسى دميتري پەسكوۆ اسادتىڭ ماسكەۋگە جۇمىس ساپارىمەن كەلگەنىن حابارلادى.
پرەزيدەنتتەردىڭ جەكە كەزدەسۋلەرىنەن كەيىن، رەسەيدىڭ جوعارعى بيلىك وكىلدەرىنىڭ قاتىسۋىمەن كەڭەيتىلگەن قۇرامدا كەلىسسوزدەر بولعان.
دميتري پەسكوۆ مالىمدەگەندەي، اساد پۋتينگە سيرياداعى احۋال تۋرالى بايانداپ، بولاشاقتاعى جوسپارلارىمەن بولىسكەن. كەزدەسۋ بارىسىندا رەسەيلىكتەردىڭ سيرياداعى اسكەري وپەراتسياسى، تەررورمەن كۇرەسۋ، ەكى جاقتى قارىم-قاتىناستىڭ ءتۇرلى باعىتتارى تالقىلانعان.
قىركۇيەكتىڭ سوڭعى كۇندەرى رەسەي سيريادا اسكەري-اۋە وپەراتسياسىن باستاعان ەدى. كرەمل مۇنى «يسلام مەملەكەتى» تەررورلىق توبىنىڭ سودىرلارىنا قارسى قيمىل دەپ تۇسىندىرەدى. الايدا، سيريادا تەررورشىلارعا قارسى اسكەري وپەراتسيا جۇرگىزىپ جاتقان ۆاشينگتون ماسكەۋدىڭ اۋە سوققىسىنىڭ باسىم بولىگى باشار اساد رەجيمىمەن كۇرەسىپ جاتقان سيريالىق وپپوزيتسيا كۇشتەرىنە قارسى باعىتتالعان دەپ وتىر.
ال، اقش اياق استىنان ماسكەۋگە رەسەي پرەزيدەنتى ۆلاديمير پۋتينمەن كەزدەسۋگە كەلگەن سيريا پرەزيدەنتى باشار اسادتى قىزىل كىلەم توسەپ كۇتىپ العان كرەمل ارەكەتىن قاتاڭ سىنعا الدى.
ء"بىز ءوز حالقىنا حيميالىق قارۋ قولدانعان اسادتى قابىلداۋ كەزىندە قىزىل كىلەم توسەپ كۇتىپ العان رەسەيدىڭ ونىمەن بىرگە سيرياعا قاتىستى مالىمدەمە جاساۋىن قابىلداي المايمىز",- دەدى اق ءۇيدىڭ رەسمي وكىلى ەريك شۋلتس جۋرناليستەرگە بەرگەن سۇحباتىندا.
اباي-اقپارات
