كۇنى كەشە عانا «abai.kz» پورتالىندا «الماتىنى رەسەي قۇرامىنا قوسىپ جىبەردى» اتتى ماقالا جارىق كورگەن بولاتىن (http://abai.kz/post/view?id=5141).

وندا تانىمال رەسەيلىك كينو رەجيسسەر تاير مامەدوۆ ءوزىنىڭ جاڭا تۋىندىسىنىڭ تيزەرىندە تاۋەلسىز قازاقستان رەسپۋبليكاسىن رەسەي فەدەراتسياسى قۇرامىنا كىرگىزىپ جىبەرگەنى جانە ء«بىزدىڭ ۇلكەن مەملەكەتىمىزدىڭ» استاناسى «ماسكەۋ» دەپ كورسەتكەنى تۋرالى ايتىلعان.  

كورەرمەندەر نازارىنا  كەلەسى جىلدىڭ قاڭتار ايىندا شىعاتىن رەسەيلىك ءفيلمنىڭ تيزەرى، دالىرەك ايتساق ونىڭ يدەولوگيالىق مىسقىنى قازاقستاندىق بەلسەندىلەردىڭ نارازىلىعىن تۋعىزعان. رەسەيلىك رەجيسسەردىڭ ۇسىنىپ وتىرعان  يدوەلوگياسى مەن استارى – كەشەگى كەڭەستىك كەزەڭدى اشىق نۇسقاعان. سەبەبى، جاڭا تۋىندىدا رەسەيدىڭ بىرنەشە قالاسىمەن قاتار، قازاقستاننىڭ الماتى قالاسى، ارمەنيانىڭ ەرەۆان قالاسى، بەلورۋسيانىڭ مينسك قالاسى، گرۋزيانىڭ تبليسي قالالارى قازىرگى رف-نىڭ قۇرامداس بولشەگى دەپ كورسەتىلگەن.

وسىعان وراي «اbai.kz» پورتالى  قر مادەنيەت جانە سپورت ءمينيسترى ارىستانبەك ءمۇحاماديۇلىن شوۆينيستىك پيعىلداعى فيلمگە قاتىستى شارا قولدانۋعا شاقىرعان بولاتىن.

ال بۇگىن قر مادەنيەت جانە سپورت ءمينيسترى ارىستانبەك ءمۇحاماديۇلى الەۋمەتتىك ورتادا داۋ تۋدىرعان ءفيلمنىڭ تيزەرىنە قاتىستى تۇسىنىكتەمە بەرگەن. ول ءوز سوزىندە مادەنيەت جانە سپورت مينيسترلىگى كەرەكتى شارالاردى قولداناتىنىن جەتكىزگەن.

ارىستانبەك ءمۇحاماديۇلى، قر مادەنيەت جانە سپورت ءمينيسترى:

– بۇل فيلم تۋرالى مەن مۇلدە ەستىگەن ەمەسپىن. بىراق، ەشكىم بۇعان بەيجايلىق تانىتپايدى. وزدەرىڭىز بىلەتىندەي، ءبىزدىڭ مينيسترلىكتە وسىنداي جاعدايلار ورىن الاتىن بولسا، قر ءسىم بىردەن رەسەي تاراپىنا  نارازىلىق نوتاسىن جىبەرەتىن بولادى.

نۇرگەلدى ابدىعانيۇلى

اباي-اقپارات