قازاقستاننىڭ قيىر سولتۇستىگىندەگى قۋلىكول اۋىلىنىڭ (سولتۇستىك قازاقستان وبلىسى، ۋاليحانوۆ اۋدانى) ءبىر توپ تۇرعىنى قر پرەمەر-ءمينيسترى كارىم ءماسىموۆتىڭ اتىنا حات جازىپ، ونىڭ كوشىرمەسىن قر پرەزيدەنت اكىمشىلىگىنە، دەنساۋلىق ساقتاۋ ۆەدومستۆوسىنا، سقو وبلىستىق دەنساۋلىق ساقتاۋ باسقارماسىنا جولداعان ەكەن. بىراق الىس اۋىلدىڭ تۇرعىندارى اتالمىش بيلىك ورىندارىنىڭ بىردە-بىرىنەن كۇنى بۇگىنگە دەيىن جاۋاپ بولماعانىن جازىپ، گازەت رەداكتسياسىنا حات جولداپتى.

ءبىز تۇراتىن قۋلىكول اۋىلى وبلىس ورتالىعىنان شالعايدا – پاۆلودار جانە اقمولا وبلىسىنا شەكتەس جەردە ورنالاسقان. بىزبەن كورشىلەس قاراتال، بەرەكە، قايرات، جاسقايرات اۋىلدارى قونىستانعان.

اۋلىمىزداعى 35 ورىندىق ەمحانا بارلىق دارىگەرلىك قۇرال-جابدىقتارمەن تولىق قامتاماسىز ەتىلگەن ەدى. پاۆلودار وبلىسىنىڭ سىلەتى، قىزىلاعاش، بۇلاندى، شولاقسور اۋىلدارىنىڭ ادامدارى ءبىزدىڭ ەمحانامىزعا كەلىپ، ەم-دوم الاتىن. باس دارىگەرىمىز سايلاۋ ىدىرىسوۆ زەينەتكەرلىككە شىققانشا، ەمحانانىڭ بارلىق ءبولىمى تولىق جۇمىس ىستەدى. ال قازىر «دارىگەرلەر جوق» دەگەن سىلتاۋمەن بارلىق جابدىقتارمەن قامتاماسىز ەتىلگەن ەمحانانى جاۋىپ، كۇندىز عانا كورىنەتىن ون ادامدىق «فاپ» دەڭگەيىندە قالدىرامىز دەگەن شەشىممەن اۋدان، وبلىستىق اۋرۋحانا باسشىلارى اۋىلىمىزعا كەلىپ كەتتى.

قۋلىكول اۋىلى اۋدان ورتالىعىنانان – 200, وبلىس ورتالىعىنان 600 شاقىرىمعا جۋىق قاشىقتىقتا ورنالاسقان. مۇندا قىس تۇگىلى، جول قاتىناسى جازدى كۇننىڭ وزىندە دە وتە ناشار. قارلى بورانداردا اپتالاپ جول قاتىناسى بولمايدى. مۇنداي ءجيى كەزدەسەتىن جاعدايدا قۋلىكول اۋىلىنىڭ ەكى مىڭعا جۋىق ادامى جانە اتالعان سەگىز ەلدى مەكەننىڭ تۇرعىندارى تولىق دارىگەرلىك كومەك بەرە المايتىن «فاپ»-قا عانا قاراپ قالساق، كۇنىمىز نە بولماق؟! ال مۇنداعى تولىق قامتاماسىز ەتىلگەن دارىگەرلىك قوندىرعىلار قولدى بولىپ كەتپەۋىنە كىم كەپىل؟!

بۇل ماسەلەمەن اۋدان باسشىلارى حاباردار بولسا دا، ءبىز الدارىنا قويىپ وتىرعان جاعداي ناقتىلى شەشىمىن ءالى تاپقان جوق. ونداعىلار اۋداندىق دەنساۋلىق ساقتاۋ ءبولىمىنىڭ اۋىل ەمحاناسىن جابۋ جونىندەگى شەشىمىمەن كەلىسكەن ءتارىزدى. قارجى تاپشىلىعىن سىلتاۋ ەتىپ، بيۋدجەتتى ۇنەمدەيمىز دەپ، جۇمىس ىستەپ تۇرعان جانە حالىققا اسا قاجەت ەمحانانى جاۋىپ تاستاۋ – كورەگەن شەشىم بولماسى انىق. قازىر اۋىلىمىزدىڭ بۇكىل حالقى ەمحانامىزدى جاۋىپ تاستايدى دەگەن قورقىنىشتى كۇندى باسىنان كەشۋدە.

ءبىز قۋلىكول تۇرعىندارى اتىنان سىزدەردەن وتىنە سۇرايتىنىمىز – ەمحانانى ءوز دەڭگەيىندە قالدىرۋعا كومەك جاساساڭىزدار ەكەن. بۇل ءبىزدىڭ عانا ەمەس، پاۆلودار وبلىسىنىڭ سىلەتى، قىزىلاعاش، شولاقسور، بۇلاندى اۋىلدارىنىڭ تۇرعىندارىنىڭ دا ءوتىنىشى.

توعىز ەلدى مەكەندەگەن تۇرعىندار اتىنان :

اۋتاليپوۆ ت.، اۋباكيروۆ ع.، جاركەنوۆ م.، گەفتين ۆ.، ماحانوۆ ت.، بولەگەنوۆ ە.، بولەگەنوۆ ق.، راحمەتتۋللين ق.، وسپانوۆ ا.، كەندىرباەۆ م.، كاكەنوۆ ب.، تۇرلىباەۆ ب.، احمەتوۆ ب.، نۇرپاۋەدەنوۆ ق.، قاجتاەۆ ج.، سادىعۇلوۆ د.، قايداروۆ ق.، جەكسەنباەۆ ج.، كاكاەۆ ز.، باساروۆا و.

«وبششەستۆەننايا پوزيتسيا»

(پروەكت «DAT» №35 (306) وت 15 وكتيابريا 2015 گ.