شىمكەنتتىڭ «كورمە ورتالىعىندا» «توقىما ونەركاسىبىنە ارنالعان تاۋارلار مەن جابدىقتار» – «MACHTEX 2015» قازاقستاندىق حالىقارالىق كورمەسى مەن فورۋمى ءوتتى. وعان وتاندىق تاۋار وندىرۋشىلەردەن بولەك، كورەيا، پولشا، رەسەي، ۋكراينا جانە تۇركيانىڭ كاسىپورىندارى قاتىسىپ، جەڭىل ونەركاسىپكە ارنالعان جابدىقتار مەن ونىمدەرىن قويدى، - دەپ جازادى "وڭتۇستىك رابات" گازەتى.

سونداي-اق قىزمەتتەرىن ۇسىنىپ، ەلدەگى جەڭىل ونەركاسىپتى قالپىنا كەلتىرۋ جولدارى مەن ونى دامىتۋدىڭ جاڭا مۇمكىندىكتەرى تالقىلاندى. شاراعا قر جەڭىل ونەركاسىپ وندىرۋشىلەر وداعىنىڭ ءتورايىمى ساۋلە شاۋەنوۆا، قر «اتامەكەن» ۇكپ اتقارۋشى حاتشىسى ەۆگەني بولگەرت، «NADLoC» جەرگىلىكتى قامتۋدى دامىتۋ ۇلتتىق اگەنتتىگى» اق باسقارماسىنىڭ توراعاسى قايرات بەكتۇرگەنوۆ پەن جەرگىلىكتى جانە شەتەلدىك تاۋاروندىرۋشىلەر قاتىستى. فورۋمدا الداعى بەس جىلدىقتا ەلدەگى جەڭىل ونەركاسىپتى دامىتۋدىڭ جولدارى مەن وعان تارتىلاتىن ينۆەستورلار تۋرالى ايتىلىپ، وڭىردەگى دايىن ءونىمدى شەتەلگە ەكسپورتتاۋ ماسەلەلەرى تالقىلاندى. جيىندا، اسىرەسە، وڭتۇستىك قازاقستاندا ماقتا-توقىما كلاستەرىن دامىتۋدىڭ ءتۇرلى جولدارىنا ەرەكشە نازار اۋدارىلدى. كيىمنىڭ قازاقستاندىق برەندتەرىن قالىپتاستىرىپ، ونى جەتكىزۋشىلەردەن مەملەكەتتىك تاپسىرىسپەن الۋ جۇيەسىن قۇرۋدىڭ جاي-جاپسارى ءسوز بولدى. وبلىستىق كاسىپكەرلىك، يندۋستريالدى-يننوۆاتسيالىق دامۋ جانە تۋريزم باسقارماسىنىڭ باسشىسى باۋىرجان وماربەكوۆتىڭ ايتۋىنشا، وڭىردەگى جەڭىل ونەركاسىپتى دامىتۋ سالاسىندا ايتارلىقتاي ىلگەرىلەۋشىلىك بار. جىل باسىنان بەرى ايماقتا اتالعان سالا بويىنشا 15,4 ميلليارد تەڭگەنىڭ ءونىمى ءوندىرىلىپ، جالپى كورسەتكىش وتكەن جىلمەن سالىستىرعاندا ەكى ەسەگە ارتقان. ونىڭ ىشىندە توقىما ءوندىرىسىنىڭ ءونىم كولەمى 12,4 ميلليارد تەڭگەنى قۇرادى. دەمەك، حالىقارالىق كورمە مەن فورۋم وتاندىق جانە شەتەلدىك كاسىپكەرلەر توقىما سالاسىندا ارىپتەستىك ورناتۋعا، جەڭىل ونەركاسىپتىڭ ودان ءارى دامۋىنا جول اشادى. ەكى كۇندىك شارادا «NADLoC جەرگىلىكتى قامتۋدى دامىتۋ جونىندەگى ۇلتتىق اگەنتتىگى» كاسىپكەرلەر ءۇشىن سەمينار ۇيىمداستىرىپ، «قازاقستاندا جاسالعان – سدەلانو ۆ كازاحستانە» اتتى بىرىڭعاي لوگوتيپتىڭ تانىستىرۋ ءراسىمىن جاسادى. سونداي-اق، قازاقستاندىق ديزاينەرلەردىڭ قولىنان شىققان ايەلدەر مەن ەرلەردىڭ جانە بالالار كيىمدەرىنىڭ كورسەتىلىمى وتكىزىلدى.

اينۇر اقباەۆا

Abai.kz