باتىرلىعى جاۋدا سىنالعان رايىمبەكتەي ەرلەردىڭ ارقاسىندا قازاق مەملەكەتىنىڭ ىرگەسى قالاندى، تۇعىرى بەكىدى.

«باسىپ الام جەرىڭدى،

سىندىرامىن بەلىڭدى،

شاۋىپ الام ەلىڭدى،

جەتىم ەتىپ بالاڭدى،

كورسەتەمىن كورىڭدى.

قالىڭ شەرىك ارتىمدا،

جاساعىم بار سەنىمدى»، - دەپ استامسي وكىرەكتەگەن قالماقتىڭ قۇبا باتىرىنا:

«جەر يەسىز دەدىڭ بە؟

مال يەسىز دەدىڭ بە؟

جان يەسىز دەدىڭ بە؟

تىنىش جاتقان ەلىمنىڭ،

تىنىشىن بۇزعان كىم ەدىڭ؟

قاعىنعان قالماق، ءجونىڭدى ايت،

اتتان ءتۇسىپ باس ءيىپ،

ايىبىڭدى تولەپ، جونىڭە قايت!

كونبەيتىن بولساڭ ايتقانعا،

تۇرىساتىن جەرىڭدى ايت!

قاھارىما تيىسسەڭ، قاندى باسىڭ بەرى تارت!» - دەپ اتويلايتىن ەر رايىمبەك جايلى «رايىمبەك! رايىمبەك!» اتتى پوەتيكالىق داستان 14-قازان كۇنى ع.مۇسىرەپوۆ اتىنداعى بالالار مەن جاسوسپىرىمدەر تەاترىنىڭ مەرەيتويلىق 70-ماۋسىمىن اشپاق. بەلگىلى تەاتر سىنشىسى اشىربەك سىعاي : «اكتەرلەر – قوسمەكەندى جاندار، بىرەۋى – ءوزىنىڭ جۇرەگى، ەكىنشىسى – كەيىپكەرى»-دەگەندى ءجيى ايتاتىن. ءارتىس كەيىپكەرىنە اينالا العاندا عانا شىعارما ومىرشەڭ. ءارتىستىڭ شىنايى ويىنى عانا وزىنە سەندىرەدى.

شىعارماشىلىق ۇجىم ارۋاقتى باباسىنىڭ بەينەسىن مارتەبەلى كورەرمەنگە قانداي ىزدەنىسپەن جەتكىزبەك؟ ۇلت ازاتتىعى ءۇشىن ايانباي شايقاسقان باتىر رايىمبەكتىڭ بەينەسىن حالقىمەن قالاي قاۋىشتىرادى؟ جاڭا قويىلىم جاڭاشىل كوزقاراستاعى كورەرمەنىن كۇتۋدە.

قازاق دالاسىن دۇبىرلەتىپ جاتقان قازاق حاندىعىنىڭ 550 جىلدىعىنا تارتۋ رەتىندە ۇسىنىلىپ وتىرعان بۇل قويىلىمنىڭ كەلەشەك ۇرپاققا ۇندەيتىن تاعىلىمى زور.

تەاترعا اسىعىڭىز، اعايىن!

تەاتردىڭ ءباسپاسوز قىزمەتى