سامارادا رەسەي قازاقتارىنىڭ كىشى قۇرىلتايى وتەدى، - دەپ حابارلايدى اباي-اقپارات.

سامارادا 3-5 قازان كۇندەرى رەسەي قازاقتارىنىڭ كىشى قۇرىلتايى وتەدى. ونى «رەسەي قازاقتارىنىڭ فەدەرالدىق ۇلتتىق-مادەني اۆتونومياسى» جالپىرەسەيلىك قوعامدىق ۇيىمى ۇيىمداستىرىپ وتىر. قۇرىلتايعا قازاقستاننان جانە رەسەيدىڭ تۇكپىر-تۇكپىرىنەن كەلەتىن قوناقتار قازاننىڭ 1-ىنەن باستاپ ساماراعا كەلە باستايدى دەپ جوسپارلانىپ وتىر. وعان دۇنيەجۇزى قازاقتارى قاۋىمداستىعىنان باراتىن دەلەگاتسيانى قر مادەنيەت جانە سپورت مينيسترلىگىنىڭ تىلدەردى دامىتۋ جانە ساياسي-قوعامدىق جۇمىس كوميتەتىنىڭ قولداۋىمەن توراعانىڭ ءبىرىنشى ورىنباسارى تالعات ماماشەۆ باستاپ بارادى. قۇرىلتاي كەزىندە  دۇنيەجۇزى  قازاقتارى قاۋىمداستىعى مەن رەسەي قازاقتارىنىڭ فەدەرالدىق ۇلتتىق-مادەني اۆتونومياسىنىڭ ءباسپاسوز ورتالىعى جۇمىس جاسايدى دەپ جوسپارلانۋدا.

جالپى رەسەي قازاقتارىنىڭ كىشى قۇرىلتايى  «اق جول» قازاق ۇلتتىق-مادەني اۆتونومياسى سامارا  ايماقتىق قوعامدىق ۇيىمىنىڭ 10 جىلدىق مەرەيتويىنا ارنالعان «دوستىقتىڭ شەكاراسى جوق» دەپ اتالاتىن مەرەكەلىك شارامەن باستالادى.  سامارا وبلىسى قازاقتارىنىڭ ماتەريالدىق ەمەس مادەني مۇراسىنىنىڭ كورسەتىلىمىنەن:  «مۇراگەر» كيىز ءۇي- مۋزەيىندەگى قازاق مادەنيەتىنىڭ تۇرمىستىق جانە  قولدانبالى ونەر بۇيىمدارىنىڭ ق كورمەسى. فوتوگراف ليۋدميلا مەلنيچەنكونىڭ «سامارا قازاقتارى» فوتو-كورمەسى. قازاقتىڭ ۇلتتىق تاعامدارىنان ءدام تاتۋ كورمەسى.  ۇلتتىق بەلگىلەر مەن ۇلتتىق كيىمدەردىڭ ساۋدا كورمەسى. رەجيسسەر سەرگەي الەكساندروۆتىڭ «ناۋرىز» ءفيلمىنىڭ كورسەتىلىمى. سامارا وبلىستىق «قايرات» قازاق جاستارى قوعامدىق ۇيىمى قىزمەتىنىڭ تانىستىرىلىمى بولادى.

ودان كەيىن قۇرىلتايدىڭ سالتاناتتى اشىلۋ ءراسىمى جاسالىپ، «اق جول 2003-2015» ءفيلمى كورسەتىلەدى. ايماقتىق بيلىك ورگاندارى وكىلدەرىنەن: گۋبەرناتور اكىمشىلىگى، وبلىستىق دۋما مەن مادەنيەت مينيسترلىگىنەن جانە قازاقستاننان كەلگەن قوناقتاردان رەسەيدەگى قازاقستان ەلشىلىگى، دۇنيەجۇزى قازاقتارى قاۋىمداستىعى، باتىس قازاقستان وبلىسى اكىمدىگىنىڭ  قۇتتىقتاۋ سوزدەرى ايتىلادى. قازاقستاندىق  «قىزداراي» توبى مەن انشىلەر  ەرلان رىسقالي، مەرۋەرت تۇسىپباەۆا، تىلەۋبەك قوجانۇلى جانە باتىس قازاقستان وبلىستىق فيلارمونياسى ارتيستەرىنىڭ، سونداي-اق  سامارا قازاقتارىنىڭ ونەر ۇجىمدارىنىڭ كونتسەرتتىك باعدارلاماسى ۇسىنىلادى.

قازاننىڭ 4-ىندە  رەسەي قازاقتارىنىڭ ۇلتتىق-مادەني اۆتونومياسىنىڭ اشىق ءماجىلىسى، قر پرەزيدەنتى ن.نازارباەۆتىڭ «نۇرلى جول – بولاشاققا باستار جول» جولداۋىنا ارنالعان جانە  «زاماناۋي رەسەي قازاقتارىنىڭ ەتنومادەني قوزعالىسى: تاجىريبە، مىندەتتەر، ساباقتار» اتتى دوڭگەلەك ۇستەل جيىندارى مەن نەفتەگورسك اۋدانىنداعى دميرتريەۆكا اۋىلىندا قازاقستاندىق ارتيستەردىڭ كونتسەرتى بولادى. كەلەسى كۇنى مۇنداي كونتسەرت كينەلسك اۋدانىنداعى قازاق اۋىلىندا جالعاسادى. 

اباي-اقپارات