پەتروپاۆل ماڭىندا رەسەي يمپەراتورىنىڭ ءبيۋستىن جەكە كاسىپكەر  قايتا قويۋعا نيەتتى ەكەنىن ايتادى. جانە  وعان ەش كەدەرگى جوق دەپ ەسەپتەيدى.

وسىدان ءبىر اي بۇرىن نيكولاي ەسكەرتكىشى ەلىمىزدىڭ سولتۇستىگىندە ورناتىلدى دەگەن اقپارات قوعامدا ءبىراز داۋ تۋدىرىپ، قارسىلىق بىلدىرگەندەر كوپ بولعان ەدى. ناتيجەسىندە ءبيۋستى ورناتۋشى كاسىپكەردىڭ وعان رۇقساتى بولماي شىعىپ، الىنىپ قالعان.

دەسەك تە كاسىپكەر پەتر ۆاگنەر شىركەۋ اۋماعىندا رەسەي يمپەراتورىنىڭ ءبيۋستىن ورناتۋعا رۇقسات قاجەت ەمەس دەيدى.  سوندىقتان ونى قايتا ورناتپاق.

“شىركەۋدىڭ ىشىندە ورناتىلدى. سول كۇيىندە تۇر. ءالى ەشقانداي وزگەرىس جوق. وزگەرىس بولماۋى دا مۇمكىن”، – دەيدى ارحانگەلكا اۋىلدىق وكرۋگىنىڭ اكىمى مۇرات قۇسايىنوۆ.

ال ءبيۋستى شىركەۋدىڭ ىشىنە ورناتۋعا ءدىن ىستەرى باسقارماسى رۇقسات بەرىپتى. تاريحشى اقمارال يبراەۆا بولسا، تاۋەلسىزدىك ءۇشىن كۇرەسكەن اتا-بابالارىمىزعا تۇگەلدەي تاس ورناتپاي جاتىپ، نيكولاي پاتشاعا ەسكەرتكىش قويۋدى ابەستىك سانايدى. قازاق حالقىن كوتەرىلىسكە شىعۋعا يتەرمەلەگەن قاندى قول پاتشاعا ەڭ الدىمەن بىزدە ەمەس، ءوز ەلىندە قۇرمەت كورسەتىلسە يگى دەپ ەسەپتەيدى.

“پاتشا ۇكىمەتىنىڭ تۇسىندا حالىققا قاناۋشىلىق بولدى. وتارلىق ەزگى وزىندىك كورىنىس تاپتى. ول نەگىزگى ساياساتقا بايلانىستى جۇزەگە اسىرىلدى، نيكولاي پاتشا كەزىندە. سوندىقتان الاش زيالى وكىلدەرى وسى پروبلەمانى كورە وتىرا ساياسي كۇرەسكە شىقتى”، – دەيدى تاريح عىلىمدارىنىڭ دوكتورى اقمارال يبراەۆا.

ال قوعام بەلسەندىلەرى، بيلىك و باستان-اق نۇكتەسىن قويۋ كەرەك ەدى دەپ ەسەپتەيدى. سەبەبى، بۇل ماسەلەدە حالىقتار اراسىندا جانجال تۋىنداتپاي، مۇنداي جاعدايعا دا جەتكىزبەۋگە دەپ بولاتىندىعىن ايتادى.

ء“بىزدىڭ قولىمىزدا قانداي بيلىك بار، قانداي مۇمكىندىك بار. شۋلاپ-شۋلاپ قويامىز”، – دەيدى  “اڭىز ادام” جۋرنالىنىڭ باس رەداكتورى جارىلقاپ قالىباي.

سونىمەن بىرگە، قوعام بەلسەندىلەرىنىڭ سوزىنشە، قازىردىڭ وزىندە ەسكەرتكىش تۋرالى ءسوز بولماۋى ءتيىس. ويتكەنى بۇل سىرتقى اسەردىڭ ناتيجەسىندەگى ارانداتۋشىلىق بولۋى مۇمكىن دەپ ەسەپتەيدى.