ماسكەۋدە وتكەن «بيلىكتى الماستىرۋ ءۇشىن» اكتسياسىنا جەتى مىڭعا جۋىق ادام قاتىستى. ولار تسەنزۋرانى بولدىرماۋدى، ساياسي تۇتقىنداردى بوساتۋدى، سايلاۋعا وپپوزيتسيا وكىلدەرىن جىبەرۋدى، شىعىس ۋكرايناداعى سوعىستى توقتاتۋدى جانە كوررۋپتسيامەن كۇرەسۋدى تالاپ ەتتى. سانكت-پەتەربۋرگتە دە بىرنەشە ونداعان حالىق بوستاندىعى پارتياسىنىڭ بەلسەندىلەرى ءدال وسىنداي ۇستانىممەن كوشەگە شىقتى.   

ماسكەۋدە ميتينگ باستالار الدىندا پوليتسەيلەر بوريس نەمتسوۆتىڭ «ۋكراينا شىعىسىنداعى كيكىلجىڭگە رەسەيدىڭ قاتىسى بار» دەگەن سوزدەرى جازىلعان پلاكاتتاردى تاركىلەدى. 

باسىندا الەكسەي ناۆالنىي باستاعان وپپوزيتسيا وكىلدەرى شەرۋدى ماسكەۋ ورتالىعىنداعى اكادەميك ساحاروۆ داڭعىلىندا وتكىزۋگە ءوتىنىش بەرگەن. بىراق قالا مەرى ۇلكەن ماسكەۋ مارافونى وتەتىن كۇنمەن تۇسپا-تۇس كەلەدى دەپ قالا شەتىنە عانا رۇقسات بەردى. 

نارازىلىق بىلدىرۋشىلەر وزدەرىنىڭ اكتسياسىن 2011 جىلدىڭ 24 قىركۇيەگىندە «ەدينايا روسسيا» پارتياسىنىڭ سەزىندە ۆلاديمير ءپۋتيننىڭ پرەزيدەنتتىك سايلاۋعا تۇسۋگە نيەتى بار ەكەنىن جاريالاعان كۇنمەن بايلانىستىراتىنىن ايتادى. وپپوزيتسيونەرلەردىڭ ايتۋىنشا، وسى كۇننەن باستاپ پۋتين رەسەي بيلىگىنىڭ «تىزگىنىن» وزگەرمەيتىندەي ەتىپ قولىنا الدى.

اباي-اقپارات