كەشەگى كۇننىڭ وتكىر ءسوزى پرەزيدەنت نازارباەۆتىڭ اۋزىنان شىقتى. پرەزيدەنت قاۋىپ ەتىپ ايتتى. ايتقان جەرى دە - ايرىقشا. حاننان اقىرىپ تەڭدىك سۇراعان سىرىم باتىر، يساتاي مەن ماحامبەتتەر ات تۇياعىن دۇبىرلەتكەن اتىراۋ جەرىندە ايتتى. سونداعى ايتىلعان ءسوز  مىناۋ: «...وسىنداي قيىن-قىستاۋ كەزىندە ەلدى ارانداتاتىندار شىقسا، ولاردى اكەسىن تانىتىپ زاڭمەن جازالايمىز». دۇرىس ايتادى. قازاقستاندا «اكەسىن تانىماي» كەتىپ، ەلدى ارانداتقاندار قاتارى كوپ. سولاردى دا وسى جازاعا ءىلىندىرۋ قاجەت. اتاپ ايتقاندا:

-          تاۋەلسىزدىكتى العانىمىزعا 24 جىل بولسا دا، ەكونوميكانى ءار تاراپتاندىرۋدى جۇزەگە اسىرا الماعان ۇكىمەتتىڭ «اكەسىن تانىتۋ» كەرەك;

-          قازبا بايلىعىمىز كوپ، شالقىپ ءومىر سۇرەتىن «ەكىنشى كۋۆەيت» بولامىز دەپ ەلدى الداعان ارانداتۋشىلاردىڭ «اكەسىن تانىتۋ» كەرەك;

-          كورشى ەلدىڭ جەرىن تارتىپ الىپ، ونىڭ تورىندە ويران سالىپ جۇرگەن ەلمەن وداق بولۋدى قالاپ، ەلدى «قوراعا تىققان» اراندانتۋشىلاردىڭ «اكەسىن تانىتۋ» كەرەك;

-          كورشى ەلدە ەكونوميكالىق داعدارىس باستالعاندا ونىڭ الدىن الۋمەن اينالىسۋدىڭ ورنىنا پرەزيدەنتتىك سايلاۋدى ەرتە وتكىزىپ، ەلدى دۇرلىكتىرگەن بەلسەندىلەردىڭ «اكەسىن تانىتىپ»، ەكىنشى مۇندايدى قايتالامايتىنداي ەتۋ كەرەك;

-          بايلىقتارىن شەتەلگە اسىرىپ، ونى وزگە ەلدىڭ بانكتەرىندە شەتەلدىك ۆاليۋتامەن ساقتاپ وتىرعان ارانداتۋشىلاردىڭ «اكەسىن تانىتۋ» كەرەك.

ايتا بەرسەك،  «كەرەكتەر» كوپ سەكىلدى. وسىمەن ءبىز دوعارايىق.  تاعى ارانداتۋشىلار بولسا، وسى ءتىزىمنىڭ سوڭىنا قوسۋ كەرەك. «تەمىردى قىزعان كەزدە سوق» دەمەيتىن بە ەدى؟! ءبىزدىڭ ويىمىزداعىنى قۇقىق قورعاۋ مەكەمەلەرى ءارى قاراي ءىلىپ الىپ كەتەر دەگەن ۇمىتتەمىز...

داۋلەت كوپتىلەۋ

Abai.kz