تالدىقورعان قالاسىنىڭ ورتالىعىندا وبلىستىق قازاقستان حالقى اسسامبلەياسى مەن «KMF» ميكروقارجىلىق ۇيىمىنىڭ دەمەۋشىلىگىمەن «كەلىسىم – بىرلىك باستاۋى» اتتى فەستيۆال ءوتتى. اتالمىش شارا تىلدەر مەيرامى مەن تالدىقورعان قالاسى كۇنىنە وراي ۇيىمداستىرىلدى.

ورتالىق الاڭعا قۇرىلعان ساحنانىڭ ءسانى اسەم قالانىڭ الۋان ءتۇستى شامىمەن استاسىپ، قوناقتاردىڭ كوز جاۋىن الارلىقتاي. وسىنداي سالتاناتتى شارادا العاشقى بولىپ ءسوز العان وبلىس اكىمىنىڭ ورىنباسارى باقتيار ونەرباەۆ: «قۇرمەتتى قوناقتار، قادىرلى قالا تۇرعىندارى، مەملەكەت باسشىسىنىڭ جارلىعىمەن بيىلعى جىل قازاقستان حالقى اسسامبلەياسى جىلى دەپ جاريا­لاندى. قازاقستان حالقى اسسامبلەياسىنىڭ مۇرىندىق بولۋى مەن دەمەۋشىلىك كورسەتۋى ارقاسىندا رەسپۋبليكالىق، وبلىستىق دەڭگەيدە كوپتەگەن شارالار ءوتتى. قۇرمەتتى قاۋىم، بۇگىنگى فەستيۆالگە ارنايى قاتىسىپ وتىرعان قوناقتارىمىزعا كوپ راحمەت. بارشامىزدىڭ سۇيىكتى قالامىز ءوسىپ، وركەندەي بەرسىن» دەي كەلە بارشا قوناقتاردى بيىلعى جىلعى ءوتىپ جاتقان مەرەكەلەرىمەن قۇتتىقتادى. ءسوز سوڭىندا «شاڭىراق» اتتى ەتنوجۋرناليستيكا سالاسىندا وتكەن تاقىرىپتىق بايقاۋدىڭ جەڭىمپازى «جەتىسۋ» تەلەكانالىنىڭ رەداكتورى نادەجدا بەلوۆا مەن وبلىستىق «وگني الاتاۋ» گازەتىنىڭ ءتىلشىسى حاسان ەسپانوۆتى ماراپاتتادى.

ەتنومادەني بىرلەستىكتەر اراسىنداعى ەڭ ۇزدىك الەمدىك جوبانى ىسكە اسىرعان وبلىستىق بولگار ەتنومادەني ورتالىعىنىڭ توراعاسى داريا كراۆچەنكونى تالدىقورعان قالاسى اكىمىنىڭ ورىنباسارى مارلەن كولباەۆ قۇتتىقتادى. سونىمەن بىرگە قازاقستان حالقى اسسامبلەياسىنىڭ ۇيىمداستىرۋىمەن وتكەن اباي وقۋلارىنىڭ جەڭىمپازدارى ەسميرا سارداروۆا، يۋليا ان، ءامينا اليەۆا قر مادەنيەت قايراتكەرى، قازاقستان جازۋشىلار وداعىنىڭ مۇشەسى، وبلىستىق «جەتىسۋ» گازەتىنىڭ باس رەداكتورى امىرە ءارىننىڭ قولىنان ماراپات الۋ قۇرمەتىنە يە بولدى.

دۇركىرەگەن تويدىڭ دۇرمەگىن قىزدىرۋعا «تالدىقورعان اۋەندەرى»، «شاعالا بي»، «ورنەك بي»، «تاۋعان تەل» سىندى ءان-بي انسامبلدەرىنىڭ ونەر جۇلدىزدارى قاتىستى. ەل بىرلىگىن ساقتاعان، تۇران دالاسىندا مامىراجاي تىرلىكتە توي تويلاپ وسكەن حالىقتىڭ بۇگىنگى بۋىنى دا اسەم قالاداعى مەرەكەنى ەستە قالارلىقتاي وتكىزدى.

 Abai.kz