قىرعىز ءسىم قازاقستانداعى قىرعىزداردىڭ رەنىشىن ەسكەرىپ جاتىر
قىرعىزستاننىڭ سىرتقى ىستەر مينيسترلىگى الماتى قالاسىنداعى باس كونسۋلدىققا تەكسەرۋ جۇرگىزەدى. وسىلاي دەپ ءسىم ستاتس-حاتشىسى دانيار سىدىكوۆ الماتىداعى قىرعىز دياسپوراسى وكىلدەرىمەن كەزدەسۋ كەزىندە ايتتى.
ونىڭ سوزىنشە، مينيسترلىك قىرعىزستاننان تىسقارى جۇرگەن ازاماتتارىنىڭ قۇقىقتارىنىڭ قورعالۋىنا اسا كوپ ءمان بەرىپ كەلەدى.
ستاتس-حاتشى جاقىن كۇندەرى قىرعىزستاننىڭ سىرتقى ىستەر مينيسترلىگى الماتىداعى باس كونسۋلدىققا ارنايى كوميسسيا جىبەرەتىنىن حابارلادى. كوميسسيا سونىمەن بىرگە الماتىدا جۇمىس ىستەپ جۇرگەن وتانداستارىمەن دە كەزدەسەدى ەكەن.
ەسكە سالا كەتەيىك، بۇنىڭ الدىندا الماتىداعى قىرعىز دياسپوراسىنىڭ وكىلدەرى، قازاقستاندا جالدانىپ جۇمىس جاسايتىن گاستاربايتەرلەر باس كونسۋلدىقتىڭ جۇمىسىن سىناعان بولاتىن.
اباي-اقپارات
