وسىدان وتىز جىلداي بۇرىن ورىن العان شاعىن وقيعانى اڭگىمە قىلايىن. بەيىمبەت دەگەن اعامىز بار، پروكۋراتۋرا ورگاندارىندا قىزمەت ىستەپ، قازىر زەينەت جاسىنا جەتۋىنە بايلانىستى دەمالىستا، ونىڭ بولات دەگەن جان جولداسى، ازاماتتىق قىزمەتتە بولعاسىن ءالى ءبىر مەكەمەدە باسشىلىق قىزمەتتە ءجۇر.

ەكەۋى وتىز جىل بۇرىن، رەسەيدىڭ ءبىر ساناتورياسىندا قىزىق جاعدايدا تانىسقان ەكەن. ماعان بولات اعامىز ءوزى ايتىپ بەرگەن. ساناتورياعا ورنالاسقان سوڭ، كەشقۇرىم، ءبىر اۋەلەتە ايتقان قازاقشا ءاندى ەستيدى، داۋسى زور، كەڭ دياپازوندى دەيدى. قازاقستاننان كەلگەن مىقتى انشىلەردىڭ ءبىرى عوي، كونتسەرت قويۋعا كەلگەن دەپ ويلادىم، الايدا شارشاپ جولدان كەلگەسىن جاتىپ قالدىم دەيدى. ەرتەسىنە تاعى سولاي قايتالانادى. سودان شىداي الماي الگى داۋىس ەستىلگەن جاققا قاراي جۇرسە، قارسى بەتتەگى عيمارات ىشىندەگى بولمەدەن شىعىپ جاتىر ەكەن. "اسسالاۋماعالەيكۋم" دەپ كىرىپ بارسام، ءبىر توپ قازاقستاننان كەلگەن ازاماتتار وتىر دەيدى. تانىسىپ، اماندىق-ساۋلىق سۇراسىپ، ءجون بىلىسە كەلە، الگى زور داۋىس يەسىنىڭ رەسەيمەن كورشىلەس قازاقستاننىڭ ءبىر اۋدانىنىڭ بىلدەي ءبىر پروكۋرورى ەكەنىن ەستىگەن بوكەڭ، ء"وي مەن ءسىزدى ءارتىس ەكەن دەپ ويلاسام" دەپ قويىپ قالادى عوي. "اۋەلگىدە، بولمەدە ءبىر جايسىز تىنىشتىق ورنادى" دەيدى، ارتىنان بەيىمبەت اعامىز جارىلدى دەيدى، "سەن مەنى قايداعى ءبىر ارتىسكە تەڭەدىڭ، ءارتىس دەدىڭ" دەگەن سياقتى. بوكەڭ ءوزى رەسەيدىڭ قازاعى، ونداي قازاقى مىنەزدى تۇسىنە بەرمەيدى، نە بولسا دا ءوزىنىڭ قاتتى قاتەلىك جىبەرگەنىن ءبىلىپ، اكەلەپ-كوكەلەپ ءجۇرىپ، ەكى كۇن دەگەندە بەيىمبەت اعامىزدىڭ كەشىرىمىن ارەڭ الىپتى.

ەسەسىنە كەيىننەن قاتتى جولداس بولىپ كەتسە كەرەك، قازىر ول ەكى اعامىزدا ورال قالاسىندا تۇرادى، ورتالارىندا وتە سىيلى ازاماتتار. مەن بۇل وقيعانى بوكەڭنىڭ ءوز اۋزىنان ەستىگەم. ەستىگەن قۇلاقتا جازىق جوق دەگەن، ەستىگەنىمدى جازىپ وتىرمىن.

P/S: ارتىستەردەن قۇرىلعالى جاتقان جاڭا پارلامەنتىمىز قۇتتى بولسىن، اجەم ايتپاقشى، ارتىنىڭ قايىرىن بەرسىن، ايتەۋىر...