بۇگىنگى كۇنى ەلىمىزدىڭ دۇنيەجۇزىلىك ساۋدا ۇيىمىنا مۇشە بولۋىنا بايلانىستى  كوپتەگەن تاۋارلاردىڭ كەدەندىك باج ستاۆكالارى تومەندەتىلدى. سونىڭ ناتيجەسىندە ورتا ەسەپتەگى كەدەندىك تاريف 10,4-تەن 6,5 پايىزعا تومەندەدى. بۇعان قوسا، ۇستىمىزدەگى جىلدىڭ 1 مامىرىنان  باستاپ، سىرتقى ەكونوميكالىق قىزمەتتىڭ تاۋارلىق نومەنكلاتۋراسى بويىنشا تومەندەتىلگەن ستاۆكاداعى كەدەندىك باج سالىعى تاعى دا كەزەڭ-كەزەڭىمەن ەنگىزىلە باستايدى.

بۇل ارينە، سىرتقى ەكونوميكالىق قىزمەتكە قاتىسۋشىلار مەن سالىق تولەۋشىلەرگە جاسالىپ وتىرعان ۇلكەن جەڭىلدىك ەكەنى ءسوزسىز. الايدا، تومەندەتىلگەن ستاۆكامەن اكەلىنگەن تاۋارلار شارتتى تۇردە شىعارىلعان بولىپ ەسەپتەلەدى دە،  ەۋرازيالىق ەكونوميكالىق وداققا مۇشە ەلدەردىڭ اۋماعىنا اپارۋعا تىيىم سالىنادى. سوندىقتان دا وسى تالاپتاردىڭ ورىندالۋىن باقىلاۋ ماقساتىندا الماتى قالالىق مەملەكەتتىك كىرىستەر دەپارتامەنتىندە ارنايى ۇيلەستىرۋ توبى قۇرىلىپ، ءوز جۇمىسىن باستاپ كەتتى.

سۋرەتتەردە: ۇيلەستىرۋ توبىنىڭ مۇشەلەرى قويمالار مەن جۇك كولىكتەرىندەگى تاۋارلاردىڭ زاڭدىلىعىن تەكسەرۋدە. 

اتاپ ايتساق، ۇستىمىزدەگى جىلدىڭ 28 قاڭتارىنا دەيىنگى مالىمەت بويىنشا، 41 سالىق تولەۋشىنىڭ دۇنيەجۇزىلىك ساۋدا ۇيىمىنىڭ تومەندەتىلگەن باج ستاۆكاسىمەن اكەلىنگەن تاۋارلارىنىڭ جالپى قۇنى 3,5 ميلليارد تەڭگەنى، جالپى سالماعى 1,4 ميلليون كيلوگرامدى قۇرادى. سولاردىڭ ىشىندە 11 سالىق تولەۋشىنىڭ قىزمەتىنە حرونومەتراجدىق تەكسەرۋ باستالىپ كەتتى. وسى ورايدا، تومەندەتىلگەن ستاۆكامەن تاۋار اكەلەتىن سىرتقى ەكونوميكالىق قىزمەتكە قاتىسۋشىلار مەن سالىق تولەۋشىلەرگە قويىلاتىن باستى تالاپتىڭ ءبىرى – ەلەكتروندىق ەسەپ-فاكتۋراسىمەن جۇمىس ىستەۋ بولىپ تابىلادى. بۇل تالاپ ەۋرازيالىق ەكونوميكالىق وداقتىڭ «قازاقستاننىڭ  دۇنيەجۇزىلىك ساۋدا ۇيىمىنا قاتىسۋىن جۇزەگە اسىرۋ تۋرالى» حاتتاماسىمەن زاڭداستىرىلعان. ساۋدا-ساتتىقتىڭ ەلەكتروندىق ەسەپ-فاكتۋراسى تۇرىنە كوشۋ قاعازباستىلىقتى ازايتىپ قانا قويمايدى، سالىقتىق اكىمشىلدەندىرۋ جۇمىستارىن جاقسارتىپ، كولەڭكەلى ەكونوميكا مەن جالعان كاسىپكەرلىكپەن اينالىسۋعا جول بەرمەيدى. ياعني، بيۋدجەتكە تۇسەتىن سالىق پەن باسقا دا تولەمدەردى باقىلاۋ شارالارىن جەڭىلدەتەدى.

28 قاڭتار كۇنى ۇيلەستىرۋ توبىنىڭ مۇشەلەرى كەزەكتى رەيد بارىسىندا «مەرسەدەس» ماركالى جۇك كولىگىن توقتاتتى. تەكسەرۋ بارىسىندا كولىك يەسى قحر-دا شىعارىلعان تاۋارلاردىڭ قازاقستانعا اكەلۋ زاڭدىلىعىن دالەلدەيتىن قۇجاتتار كورسەتە المادى. بۇل فاكتى بويىنشا ەكونوميكالىق تەرگەۋ قىزمەتىنىڭ قىزمەتكەرلەرى تاراپىنان قىلمىستىق ءىس قوزعالىپ، الدىن الا تەرگەۋ شارالارى باستالىپ كەتتى.

الماتى قالالىق مەملەكەتتىك كىرىستەر دەپارتامەنتىنىڭ ءباسپاسوز قىزمەتى

Abai.kz

سۋرەتتەردە: ۇيلەستىرۋ توبىنىڭ مۇشەلەرى قويمالار مەن جۇك كولىكتەرىندەگى تاۋارلاردىڭ زاڭدىلىعىن تەكسەرۋدە.