دۇنيەجۇزىلىك دەنساۋلىق ساقتاۋ ۇيىمىنىڭ (ددۇ) اتقارۋ كەڭەسى بۇگىن جەنەۆادا لاتىن امەريكاسى مەن كاريب باسسەينى ەلدەرىندە تارالا باستاعان زيكا ۆيرۋسىنا قارسى جەدەل شارالار قابىلداۋعا ارنالعان شۇعىل جيىن وتكىزەدى.

جيىن وتكىزۋ تۋرالى شەشىم امەريكالىق عالىمدار زيكا بەزگەگى ىندەتى پايدا بولۋ قاۋپى بار دەپ ەسكەرتكەن سوڭ قابىلداندى. ماسا ارقىلى تارالاتىن زيكا ۆيرۋسى كوبىنە اياعى اۋىر ايەلدەرگە جۇعىپ، ىشتە جاتقان شارانانىڭ باسى مەن مي كولەمىن كىشىرەيتىپ، اقىل-ەسىنىڭ كەمدىگىنە اكەلەدى.

زيكا ۆيرۋسىن جۇقتىرعاندار اقش-تا دا تىركەلە باستادى. نيۋ-يوركتە ءتورت ادام، كاليفورنيا، ميننەسوتا، ۆيرگينيا، اركانزاس شتاتتارىندا ءبىر-ءبىر ادامنان قاتەرلى ۆيرۋستى جۇقتىرعانى انىقتالعان. اقش اۋرۋحانالارىنا ۆيرۋس تارالعان تروپيكالىق ەلدەرگە بارىپ كەلگەن ادامداردان دونورلىق قان الۋدى ۋاقىتشا توقتاتۋ تۋرالى تاپسىرما بەرىلدى. كەيبىر اۋە كومپانيالارى لاتىن امەريكاسىنا ۇشاتىن رەيستەرگە بيلەت العان اياعى اۋىر ايەلدەرگە اقشاسىن قايتارىپ بەرۋدى ۇسىنىپ جاتىر.

زيكا ۆيرۋسىنىڭ بەلگىلەرى دەنگە بەزگەگىنە ۇقسايدى. بۇل ۆيرۋسقا قارسى ازىرگە ەشقانداي ءدارى ويلاپ تابىلماعان. كوپ جاعدايدا ۆيرۋسقا دارىگەرلەر كومەكتەسە المايدى. ۆيرۋس اياعى اۋىر ايەلدەرگە قاتتى قاۋىپ توندىرەدى.

Abai.kz