سايلاۋبەك سايلاۋعا تۇسەتىن بولدى
بيلىك پەن قوعامعا توسىن ۇسىنىستار جاساپ، «توپ جارىپ» جۇرگەن قازاقستان مۇسىلماندارى قاۋىمداستىعىنىڭ توراعاسى مۇرات تەلەبەكوۆ تۇسىنىكسىز تىلدە رەپ ايتۋمەن اتى شىققان مس سايلاۋبەكتى الداعى سايلاۋعا تۇسۋگە شاقىرىپ، مالىمدەمە جاساعان بولاتىن. تەلەبەكوۆتىڭ «تەنتەكتەۋ» مالىمدەمەسىن الەۋمەتتىك جەلىلەردە وتىرعان جۇرت بىرجاقتى قابىلداعانىمەن ونىڭ استارىنان كۇلكى، ءاجۋا اۋلاعاندار دا تابىلىپ جاتىر. كىم نە دەسە دە مس-ءدىڭ قر ازاماتى رەتىندە سايلاۋعا ءوز كانديداتۋراسىن ۇسىنۋعا، داۋىس بەرۋگە قاقىسى بار. راسىندا، سولاي بولىپ شىقتى. رەپەردىڭ پروديۋسەرى بىزبەن سۇحباتىندا سايلاۋ دوداسىنا سايلاۋبەكتىڭ تۇسەتىنى تۋرالى اعىنان جارىلىپ ايتىپ بەردى.
اسىلان باقىتجان، مس سايلاۋبەكتىڭ پروديۋسەرى:
– اسىلان، سوڭعى كۇندەرى سايلاۋبەك باۋىرىمىزدى قر پارلامەنت ماجىلىسىنە دەپۋتات ەتىپ سايلاۋ كەرەكتىگى جونىندە ءسوز قوزعالىپ جاتىر. بۇل ماسەلەگە قاتىستى وزدەرىڭىزدىڭ ويلارىڭىزدى بىلسەك دەپ ەدىك.
– مۇنداي ۇسىنىستى ەستىپ، ءبىز دە ويلانىپ قالدىق. كەشەلى بەرى ءتيىستى ادامدارمەن اقىلداسىپ، سايلاۋبەكتىڭ كانديداتۋراسىن دەپۋتاتتىققا ۇسىنۋدىڭ جولدارىن قاراستىرىپ جاتىرمىز. قۇداي قالاسا، ساكەڭنىڭ قولداۋشىلارى كوپ، دەپۋتات بولۋ مۇمكىندىگى بار دەپ ويلايمىز.
– سايلاۋبەكتىڭ ءوزىنىڭ ويى قانداي؟ دەپۋتات بولعىسى كەلە مە؟ ول كىسىمەن سويلەسە الامىز با؟
– ساكەڭ دەپۋتات بولۋعا قارسى ەمەس. سايلاۋبەك قازىر «بانيادا». سويلەسە المايدى. ءبىر ساعاتتاي شومىلادى. شومىلىپ بولعان سوڭ، تىلدەسۋىڭىزگە بولادى.
– ساكەڭ دەپۋتات بولسا، حالىق قالاۋلىسى رەتىندە قانداي ماسەلەلەردى شەشۋگە بەل سىبانا كىرىسۋى مۇمكىن؟
– بۇل جايت ازىرشە قۇپيا بولىپ قالا تۇرسىن...
– سايلاۋبەكتىڭ اتىنىڭ ءوزى قىزىق. ول كىسىنىڭ اتى نەلىكتەن سايلاۋبەك قويىلعانىن بىلەسىز بە؟
– ارينە، مەن ول كىسىنىڭ ءومىر-تاريحىمەن تولىق تانىسقان اداممىن. بۇل اتتى سايلاۋبەكتىڭ اتاسى قويعان. ول اتامىز كورىپكەل ادام بولىپتى. باستاپقىدا نەمەرەسىنىڭ اتىن «سايلاۋحان» دەپ قويماقشى بولعان ەكەن، كەيىننەن سايلاۋبەك دەگەن ات بۇيىرىپتى.
– بالكىم اتاسى بۇگىنگى جاعدايدى، نەمەرەسىنىڭ پارلامەنت سايلاۋىنا دەپۋتات رەتىندە قاتىساتىنىن بولجاپ، وسىلاي ات قويعان شىعار...
– ەندى ونى ناقتى بىلمەيمىن. بىراق، كورىپكەل ادام نەمەرەسىنىڭ اتىن بۇلاي بەكەر قويمايدى عوي.
– سىزدەر قاي پارتيا ارقىلى سايلاۋعا ءتۇسۋدى ويلاپ وتىرسىزدار؟ مس سايلاۋبەك قاي پارتياعا مۇشە بولماق؟
– ونى ءالى شەشكەن جوقپىز. بۇل يدەيا ايتىلعالى ءبىر-اق كۇن ۋاقىت ءوتتى عوي. بۇگىن اقىلداسىپ، قاي پارتياعا مۇشە بولاتىنىمىزدى شەشەمىز. سوسىن سايلاۋعا دايىندىقتى باستاماقپىز...
– اڭگىمەڭىزگە راحمەت
Abai.kz
