سوتتالۋشىلار قىلمىستىق كودەكستىڭ «الەۋمەتتىك، ۇلتتىق، رۋلىق، ناسىلدىك، تاپتىق نەمەسە ءدىني الاۋىزدىق تۋدىرۋ» دەيتىن 174-ءشى بابىمەن كىنالى دەپ تانىلدى. سوتتالۋشىلار وزدەرىن ايىپتى رەتىندە مويىندامادى، بەلسەندىلەردىڭ جاقتاستارى بۇل ءىستىڭ ساياسي استارى تۋرالى مالىمدەدى. سوت ۇكىمىمەن مامبەتالين مەن نارىمباەۆقا تۇرمەدەگى جازاسىن وتەپ شىققاننان كەيىن بەس جىل بويى قوعامدىق-ساياسي قىزمەتپەن شۇعىلدانۋلارىنا تىيىم سالىندى.

قىلمىستىق ءىستىڭ باستالۋىنا بەلسەندىلەردىڭ Facebook الەۋمەتتىك جەلىسىندەگى جەكە پاراقشالارىنا «ۆەتەر س ۋليتسى» كىتابىنان ءۇزىندى كەلتىرگەندەرى سەبەپ بولدى. سوتتالۋشىلاردىڭ وزدەرى كىتاپتىڭ ءۇزىندىسىن ينتەرنەتتەن كوشىرىپ العاندارىن ايتادى. كىتاپتىڭ اۆتورى، كەلەسى بەلسەندى مۇرات تەلىبەكوۆ سوتتا جارىق كورمەگەن كىتابىندا مۇنداي ءماتىننىڭ جوقتىعى تۋرالى مالىمدەدى. مۇرات تەلىبەكوۆتىڭ ۇستىنەن دە قىلمىستىق ءىس قوزعالدى.سوتتالۋشىلار ءماتىندى كوشىرىپ الدىق دەگەن سايتتىڭ يەسى الەكساندر لياحوۆ تا تەرگەۋشىلەرگە جاۋاپ بەرۋدە. ​ەرمەك نارىمباەۆ پەن سەرىكجان مامبەتالين الماتىدا بىلتىر جەلتوقساننىڭ 12-ءسى كۇنى تۇتقىندالدى.

بۇعان دەيىن ەرمەك نارىمباەۆ بيلىككە قارسى نارازىلىق شارالارى ءۇشىن بىرنەشە رەت اكىمشىلىك جاۋاپقا تارتىلعان ەدى.

سەرىكجان مامبەتالين ءوزى باسقارعان «رۋحانيات» پارتياسى 2011 جىلى قاڭتاردىڭ 15-دە پارلامەنت سايلاۋىنا قاتىسۋ قۇقىعىنان ايىرىلعان سوڭ پارتيا توراعالىعىنان كەتىپ، الەۋمەتتىك جەلىلەردە بيلىكتى سىناۋعا كوشكەن ەدى.

حالىقارالىق Human Rights Watch قۇقىق قورعاۋ ۇيىمى ۇكىمەتتىڭ اتىنا سىن ايتقانى ءۇشىن قازاقستانداعى بەلسەندىلەردى تۇتقىنداۋدىڭ جاڭا تولقىنىن توقتاتۋعا شاقىردى.