تۇركيا پرەمەر-ءمينيسترى احمەتوم داۆۋتوگلۋمەن كەزدەسكەن اقش ۆيتسە-پرەزيدەنتى دجو بايدەن ساياسي شەشىم تابىلماسا، اقش جاعدايدى رەتتەۋدىڭ بالاما جولدارىن قاراستىراتىنىن مالىمدەدى. كەيىنىرەك اق ءۇي ۆيتسە-پرەزيدەنتتىڭ ساياسي شەشىم تۋرالى ءسوزى سيريالىق ۇكىمەت پەن كوتەرىلىسشىلەر اراسىنداعى بەيبىت كەلىسسوزدەرگە قاتىستى ايتىلعانىن، ال اسكەري شەشىمنىڭ تەك يم-گە قاتىسى بارىن جەتكىزدى.

سيريا بيلىگى مەن وپپوزيتسيا وكىلدەرىنىڭ  بۇۇ باستاماسىمەن وتەتىن كەلىسسوزدەرىنىڭ باستالۋى كەلەسى اپتاعا جوسپارلانعان. ۇلىبريتانيا پرەمەر-ءمينيسترى دەۆيد كەمەرون بۇل شاراعا رەسەيدىڭ دە قاتىسۋى كەرەكتىگىن مالىمدەدى.

اقش-ىڭ يم-گە قاتىستى جوسپارلارىمەن بولىسكەن اقش ۆيتسە-پرەزيدەنتى ولاردىڭ تۇپكى ماقساتى  «دايش-تى جويۋ» ["يسلام مەملەكەتىنىڭ" باسقا اتاۋى] ەكەنىن ءتۇسىندىرىپ كەتتى. بايدەن سونىمەن بىرگە، تۇركيادا تىيىم سالىنعان كۇردىستاننىڭ جۇمىسشى پارتياسى انكارا ءۇشىن جيحادشىلار سەكىلدى قاۋىپ كوزى بوپ تابىلاتىنىن ايتتى. ول كۇردتەردىڭ پارتياسىن كادىمگى تەررورلىق توپ رەتىندە اتاپ، ولاردىڭ ارەكەتتەرىن سىنعا الدى.

تاۋەلسىز مەملەكەت قۇرۋعا ۇمتىلعان كۇردتەر مەن تۇركيا اراسىنداعى اسكەري قاقتىعىس 30 جىلدان استام ۋاقىت جالعاسۋدا. وسى ۋاقىت ىشىندە 40 مىڭنان استام ادام ونىڭ قۇربانى بولدى. بۇعان دەيىن تۇركيا پرەزيدەنتىمەن كەزدەسۋى كەزىندە بايدەن تۇركيادا ءسوز بوستاندىعى شەكتەلەتىنىن، اتاپ ايتقاندا جۋرناليستەردى قورقىتۋ، الەۋمەتتىك جەلىلەردى ءوشىرۋ جانە بيلىكتى سىنايتىندارعا وپاسىزدىق جاسادى دەگەن ايىپ تاعۋ سەكىلدى شارالار قولدانىلاتىنىن ايتىپ سىناعان ەدى.