اسا قۇرمەتتى ەلباسى، نۇرسۇلتان ءابىشۇلى!

ەلىمىز ەگەمەندىك الىپ ەڭسەسىن تىكتەگەلى، مىنەكەي، اتتاي 25 جىلدىڭ ءجۇزى بولىپتى، سودان بەرى ەل ءۇشىن ىستەگەن وراسان ەڭبەكتەرىڭىزگە حالقىڭىز ءدان ريزا. سول ىزگى ىستەرىڭىزدىڭ ءبىرى جانە بىرەگەيى تاۋەلسىزدىك الا سالىپ، ءسىز باس بولىپ شەتتەگى قانداستارىڭىزدى ءوز وتانى قازاقستانعا شاقىردىڭىز، سودان بەرى  ەلگە 1 ملن 100 مىڭ قازاق ورالدى.

الەمدە ءوز قانداستارىن ارنايى كۆوتامەن جيناپ وتىرعان جالعىز-اق ەل بار. ول - قازاقستان. جەر بەتىندە مۇنداي مەملەكەتتىك دەڭگەيدەگى كوش-قون ءۇردىسىن، قانداستارىن ەلگە ورالتۋ قۇبىلىسىن قازاقستاننان باسقا ەشبىر ەل جاساعان ەمەس. الەمدەگى بارلىق قازاقتىڭ اللادان كەيىنگى پاناسى - ءبىزدىڭ وسى ساعىم تۇنعان ۇلى دالامىز جانە ءسىز عانا.

ەلدەگى قازاق تا، شەتتەگى قازاق تا ايتەۋىر  وتانىم بار دەپ ءومىر سۇرەدى. ەندى وسى قارقىنمەن تاعى دا 1,5 ملن. قازاق ورالسا، ول ۇلكەن جەتىستىك بولار ەدى. ەلباسى ساياساتى ايقىن، باعدارى دۇرىس، اق تۇيەنىڭ قارنى جارىلاتىن كۇن الىس ەمەس. اۋدانىمىزعا كەلگەن قانداستارىمىز قازاق ەلىنىڭ تۇراقتى ازاماتى رەتىندە تەڭ قۇقىقتى بولىپ، مارە-سارە كۇي كەشۋدە. قۇدايعا تاۋبە، ءۇيى، كاسىبى  بار، كولىگى دايىن، تاماعى توق، كيىمى ءبۇتىن، بۇنىڭ ءبارىن ءسىزدىڭ ەلگە دەگەن ىستىق ىقىلاسىڭىزدان بولە قاراۋعا استە بولمايدى. 1 ملن. قازاق دەگەن ءسوز ء بىر ۇلكەن قالانىڭ تۇرعىنى عوي، بۇل ەڭبەگىڭىز تاريحتا التىن ارىپپەن قالاتىنى ءسوزسىز.

بۇگىندە ەلگە ورالعان قانداستارىمىز ونەردە، سپورتتا، ءبىلىم جانە ەلىمىزدىڭ الەۋمەتتىك سالالارىندا بەلدى ەڭبەك ەتۋدە، تىپتەن ماماندىعى جوقتارىنىڭ ءوزى مالىن باعىپ6 شارۋاسىن دوڭگەلەتىپ ءجۇر. بۇگىنگىدەي داعدارىس ۋاقىتىندا قانداستارىڭىزعا قۇشاق جايىپ: «Rەلەم دەۋشىلەرگە ەسىگىمىز ءاردايىم اشىق» دەگەن ءبىر اۋىز ءسوزىڭىز بار قازاققا جىلۋ سىيلاعانداي بولدى. جاڭا زاڭ شەتتەگى قانداستارىڭىزدىڭ وتانعا دەگەن تەرەڭ سۇيىسپەنشىلىگىن وياتىپ، ءبىر مەزەت توقىراعان كوشكە جاڭا سەرپىن بەردى.

سىزگە ايتار العىسىمىز شەكسىز، ءاردايىم ەلىڭىزدىڭ قورعانى بولىپ امان ءجۇرۋىڭىزدى بارشا حالىق تىلەۋدە. سىزگە زور دەنساۋلىق تىلەي وتىرىپ، وسى ءبىر ميلليونعا جۋىق  قانداستارىڭىزدىڭ ىشىندە نە ءبىر ىسكەر، ەلىم دەگەن ازاماتتار جۇرگەنىن، سولاردىڭ ءبىرىن الداعى جاڭا پارلامەنت دەپۋتاتتارىنىڭ اراسىنان كورگىمىز كەلەتىنىن ايتىپ، ءوتىنىش ەتەمىز. بۇل ءوز كەزەگىندە بيلىك پەن قانداستار اراسىنداعى كەيبىر تۇسىنىسپەۋشىلىكتى جويىپ، التىن كوپىرگە اينالارىنا كامىل سەنەمىز.

...بىلگە قاعاننىڭ زامانىنان قالعان ءبىر ءسوز بار: «از حالىقتى كوپ قىلدىم، اش حالىقتى توق قىلدىم». بالكىم، سونداي زامان ەجەلگى تۇركىنىڭ سار دالاسىنا تاعى قايتا اينالىپ كەلە جاتقان شىعار...

ىزگى نيەتپەن: نۇرعايني ماناپقىزى مۇقانوۆا، ورەحوۆا تاتيانا ۆلاديميروۆنا (كۇرشىم اۋداندىق كىتاپحاناسىنىڭ كىتاپحاناشىسى), ارزۋبوۆ ۆلاديمير (ورتالىق كىتاپحانا جۇمىسشىسى), سولتان اندجەليكا (اۋداندىق مادەنيەت ءۇيىنىڭ جۇمىسشىسى) قاتارلى 19 ادام قول قويدى. حات پوچتا ارقىلى ەلباسىنىڭ اتىنا دا جولدانعان.

كۇرشىم اۋدانى

شىعىس قازاقستان وبلىسى

Abai.kz