انكارادا قىرعىز-تۇرىك بيزنەس فورۋمى باستالدى.

جيىننىڭ باستى ماقساتى – قىرعىزستان ەۋرازيالىق ەكونوميكالىق وداققا مۇشە بولعاننان كەيىنگى ەكىجاقتى ارىپتەستىكتى دامىتۋ. فورۋمعا قىرعىزستاننان 100-دەن اسا كاسىپكەر مەن قىرعىز ۇكىمەتىنىڭ مۇشەلەرى قاتىسۋدا. تۇرىك جاعىنان 150 كاسىپكەر جيىنعا قىزىعۋشىلىق تانىتقان.

ەكى كۇنگە سوزىلاتىن فورۋم بارىسىندا قىرعىزستاننىڭ ينۆەستيتسيالىق الەۋەتى كورسەتىلىپ، قىرعىز-تۇرىك ىنتىماقتاستىعىنىڭ بولاشاعى تالقىلانادى.

فورۋمدا ءسوز سويلەگەن تۇركيانىڭ كەدەن جانە ساۋدا مينيسترى بيۋلەنت تيۋفەكچي تۇركيانىڭ قىرعىزستانمەن ساۋدا-ەكونوميكالىق ىنتىماقتاستىعىن دامىتۋعا مۇددەلى ەكەنىن ايتتى.

ونىڭ سوزىنشە، ەكونوميكالىق داعدارىستان ەكى ەل اراسىنداعى تاۋار اينالىمى كۇرت ءتۇسىپ كەتكەن. الايدا قيىندىقتارعا قاراماستان ارىپتەستىكتى نىعايتا بەرۋ قاجەتتىگى ايتىلدى. «ەگەر قىرعىز تارابى ينۆەستورعا قاجەت جاعداي جاساسا،ءبىز قولداۋعا دايىنبىز»، -دەدى تيۋفەكچي.

قىرعىزستاننىڭ ەكونوميكا ءمينيسترى ارزىبەك كوجوشەۆ وز كەزەگىندە ەلىن ينۆەستورلار ءۇشىن جۇماق جەر دەپ اتادى. ونىڭ ايتۋىنشا ەلدەگى سالىقتار ەڭ تومەن جانە ارزان جۇمىس كۇشى بار. ينۆەستيتسيا قۇيۋ ءۇشىن بار بولعانى ۇشاققا بيلەت الۋ عانا قاجەتتىگىن، قالعان ماسەلەنى قىرعىز ۇكىمەتى موينىنا الاتىنىن مالىمدەدى.

 تۇرىك كاسىپكەرلەرى اۋىل شارۋاشىلىعى، IT-تەحنولوگيا، قۇرىلىس سالاسىنا قارجى قۇيۋعى قىزىعۋشىلىق تانىتىپ وتىر. ولار «ماناس» اۋەجايىنداعى حاب قۇرىلىسىنىڭ جوباسىنا  جانە تەحنوپارك سالۋعا قاتىسۋعا دايىن. الايدا ولاردى ينۆەستيتسيا قۇيعىسى كەلەتىن سالالار تۋرالى اقپاراتتىڭ ازدىعى الاڭداتادى.

فورۋم بارىسىندا ەكى ەل وكىلدەرىنىڭ اراسىندا ساۋدا-ەكونوميكالىق دامۋ، شاعىن جانە ورتا بيزنەستى دامىتۋ جانە قىرعىزستانداعى وندىرىستىك ايماقتاردى تۇرىك ۇلگىسىمەن دامىتۋ تۋرالى ءۇش كەلىسىمگە قول قويىلدى.

Abai.kz