قاڭتاردىڭ 19-دا بۇل ۇسىنىستى «حوۆار» مەملەكەتتىك اقپارات اگەنتتىگى تاراتتى.

ابدۋللو مۋحاككيك پرەزيدەنت ەمومالي راحموننىڭ ايەلىن قاسيەتتى ايشا اناعا تەڭەيدى. ونىڭ سوزىنشە، ەل پرەزيدەنتىنىڭ زايىبى ورتالىق ازياداعى نازىك جاندىلاردىڭ اراسىندا ءبىرىنشى بوپ قاعباعا كىرىپ، سوندا ناماز وقىعان. وسىعان وراي، ول قۇرمەت بەلگىسى رەتىندە ازيزامو راحمونوۆانى "يسلام ايەلدەرىنىڭ كوشباسشىسى" دەپ جاريالاۋدى ۇسىنادى.

ەل كوزىنە كورىنە بەرمەيتىن ازيزامو راحمونوۆا 2014 جىلدىڭ جازىندا كۇيەۋىمەن بىرگە مالايزياعا بارعان ساپارىندا ۇلتتىق كيىم جانە ورامالمەن شىققان ەدى. ءبىرىنشى لەديدىڭ بۇل قادامىن قۇپتاعاندار سونىمەن بىرگە، ەلدەگى ورامال تارتقان وزگە ايەلدەرمەن كۇرەس ءجۇرىپ جاتقانىنا تاڭدانىپ قالعان بولاتىن.

بۇل ۇسىنىستىڭ الدىندا عانا، جەلتوقسان ايىندا  پرەزيدەنت ەمومالي راحمون ارنايى زاڭعا قول قويۋ ارقىلى، وزىنە «ۇلت كوشباسشىسى» دەگەن مارتەبە تاعايىنداعان ەدى. بۇل مارتەبە ونى بيلىك باسىندا ىستەگەن ىستەرى ءۇشىن جاۋاپقا تارتۋدان بوساتادى جانە ول بيلىكتەن كەتكەننىڭ وزىندە ونىڭ ىقپالىن ساقتاپ قالادى.

ەمومالي راحمون مەن ەندى ونىڭ ايەلىنە دە وسىنداي مارتەبە بەرىلۋىنە قارسىلار مۇنى تاجىكستاندا جەكە باسقا تابىنۋشىلىقتى ورناتۋدىڭ كەزەكتى قادامى رەتىندە سانايدى.