يم سيريانىڭ شىعىسىندا 400 ادامدى الىپ كەتكەن
سيريانىڭ شىعىسىندا جاڭا ايماقتى باسىپ العان «يسلام مەملەكەتى» (يم) ەكسترەميستىك توبى كەمىندە 400 بەيبىت تۇرعىندى ۇستاپ الىپ كەتكەن، ولاردىڭ اراسىندا ايەلدەر مەن بالالار بار.
بۇل تۋرالى بۇگىن سيرياداعى ادام قۇقىقتارى احۋالىنا مونيتورينگ جاسايتىن ۇلىبريتانيادا ورنالاسقان ورتالىق حابارلاعان.
ۇيىمنىڭ مالىمەتى بويىنشا، يم سودىرلارى الگى ادامداردى بۇعان دەيىن بيلىكتىڭ باقىلاۋىندا بولعان دەير-ەز-زور قالاسىنىڭ شەتىندەگى ءال-باگاليە ەلدىمەكەنىنەن كۇشتەپ الىپ كەتكەن. ورتالىق جەتەكشىسى رامي ابدەل راحماننىڭ سوزىنشە، يم الىپ كەتكەندەردىڭ اراسىندا ۇكىمەتشىل كۇشتەر قاتارىندا سوعىسىپ جۇرگەن ساربازداردىڭ تۋعان-تۋىستارى بار. DPA اگەنتتىگىنە سۇحباتىندا ول يم سودىرلارى ۇرلانعان ادامداردى ءولتىرىپ تاستاۋى نەمەسە قۇلدىققا سالۋى مۇمكىن دەگەن قاۋپىن ايتقان.
قۇقىققورعاۋشىلاردىڭ دەرەگى بويىنشا، سەنبى كۇنى ءال-باگاليە ەلدىمەكەنىنە شابۋىل كەزىندە كەمىندە 85 بەيبىت تۇرعىن جانە سيريالىق ۇكىمەت كۇشتەرى مەن جارتىلاي اسكەري جاساق قاتارىنان 50 سارباز مەرت بولعان.
سيريانىڭ «SANA» مەملەكەتتىك اگەنتتىگى اقپاراتىندا يم سودىرلارى كەمىندە 300 بەيبىت تۇرعىندى، نەگىزىنەن قارت ادامدار، ايەلدەر مەن بالالاردى ولتىرگەن دەپ ايتىلعان.
«يسلام مەملەكەتى» ەكسترەميستىك توبى دەير-ەز-زور پروۆينتسياسىنىڭ كوپ بولىگىن جانە ونىڭ وسى اتتاس ورتالىعىن باقىلاۋىندا ۇستاپ وتىر.
اباي-اقپارات
