كەشەلى بەرى قازاقفيلم اق-نىڭ اۋلاسىنان الىپ-قاشتى ءسوز شىعىپ جاتىر. باستاپقىدا كوپ قاۋەسەتتىڭ ءبىرى شىعار دەگەنىمىزشە بولعان جوق، رەجيسcەر جاننا يمانباەۆا الەۋمەتتىك جەلىدەگى جەكە پاراقشاسىندا قازاقفيلمدە بولىپ جاتقان توسىن جايتتىڭ بەتىن اشىپ تاستادى. جاننا حانىمنىڭ جازۋى بويىنشا، قازاقفيلمنىڭ كينوستۋديوسىنا اتقارۋشى ديرەكتور بولىپ رەسەيلىك باجين دەگەن بىرەۋ كەلىپ جاتقان كورىنەدى. ماسەلەنىڭ ءمان-جايىن ناقتىلاي ءتۇسۋ ءۇشىن Vlast.kz سايتىنىڭ ءتىلشىسى قازاقفيلم اق-نىڭ پرەزيدەنتى باقىت قايىربەكوۆ مىرزاعا (سۋرەتتە) حابارلاسادى. تاپ قازىرگى ۋاقىتتا شەتەلدەردىڭ بىرىندە ەم قابىلداپ جاتقان باقىت عافۋۇلى قوڭىراۋ سوققان تىلشىگە تاڭ قالا وتىرىپ، ءمان-جايدى بايان ەتەدى.

-          بۇل مەن ءۇشىن كۇتپەگەن جاڭالىق، - دەي كەلىپ قازاقفيلمنىڭ پرەزيدەنتى قايىربەكوۆ اتقارۋشى ديرەكتور بولعالى تۇرعان ءباجيننىڭ قىزمەتى تۋرالى وزىمەن ەشكىمنىڭ اقىلداسىپ-كەڭەسپەگەنىن، ەسكەرتىپ ايتپاعانىن بىلدىرەدى. تەك مادەنيەت جانە سپروت ۆيتسە-ءمينيسترى عانا ەمەۋرىن ءبىلدىرىپ: ء«باجيندى قازاقفيلمگە اكەلسەك، ول بىزدەگى كينووندىرىستىڭ دامۋىنا سەپتىگىن تيگىزەر ەدى»، - دەگەندى اڭعارتسا كەرەك. الايدا ءباجيننىڭ قازاق كينووندىرىسىنە قولعابىس تيگىزە قويارىنا باقىت قايىربەكوۆ كۇماندى سياقتى.

-         ول ءوزى پيتەرلىك رەجيسسەر. سونداعى كينەماتوگروفيستەر وداعى باسقارماسى باسشىلارىنىڭ ءبىرى. سونداي قىزمەتىن تاستاپ، ءباجيننىڭ الىپ-ۇشىپ قازاقفيلمدى كوركەيتەمىن دەپ كەلە قويعانىنا تاڭىم بار. كوركەيتەمىن، كەمەلدەندرەمىن دەسە ءوزىنىڭ شارۋاسى وزىنە جەتىپ جاتىر ەمەس پە؟ – دەيدى قازاقفيلمنىڭ باسشىسى.

ۆلاديمير ءباجيندى قازاقفيلمگە، قازاقستانعا قاراي جەتەلەي جونەلگەن ماسەلە، بالكىم، قارجى قاراجات ماسەلەسى شىعار؟ باقىت عافۋۇلى دا وسىلاي ويلايتىنىن جاسىرمايدى.

-         قازىر رەسەيدىڭ ەكونوميكالىق احۋالى، اسىرەسە، كينووندىرىسىنە قيىن سوعىپ تۇر. سوندىقتان رەسەيدىڭ كينونارىعىنداعى ادامداردىڭ قازاقستانعا كەلۋى تۇسىنىكتى، - دەيدى ول.

ءجا، سولاي-اق بولسىن. الايدا، رەسەي ەكونوميكالىق قيىندىقتى باستان كەشۋدە ەكەن دەپ ونىڭ ءباجينى مەن باسقاسىن اسىراۋ – قازاقفيلم مەن قازاقستاندىق سالىق تولەۋشىلەردىڭ مىندەتى ەمەس. وسىنىڭ ءبىرىن ەسكەرمەستەن بىلتىر جەكەشەلەنىپ كەتكەن  قازاقفيلم اق-نا ءبىزدىڭ بيلىك بەلدەن باسىپ ءباجيندى باستىقتاردىڭ ءبىرى ەتىپ تاعايىنداپ جاتىر.

P.S. سانكت-پەتەربور كينەماتوگروفيستەر وداعى باسقارماسىنىڭ مۇشەسى ءارى رف كينەماتوگروفيستەر وداعىنىڭ مۇشەسى بولىپ تابىلاتىن ۆلادميري باجين پيتەرلىك كينورەجيسسەر ءارى ستسەناريست سنەجكين دەگەننىڭ جاقىن ادامى كورىنەدى. سنەجكين ءبىزدىڭ ەلباسى تۋرالى «تاك سلوجيليس زۆەزدى» اتتى كەزەكتى كينوكارتينانىڭ قويۋشى-رەجيسسەرى بولدى دەپ جازادى جاننا يمانباەۆا ءوزىنىڭ الەمجەلىدەگى جەكە پاراقشاسىندا.

Abai.kz