اق ءۇيدىڭ ءباسپاسوز حاتشىسى دجوش ەرنەست: «ولاردىڭ اڭگىمەسىنىڭ باسىم بولىگى رەسەيلىكتەردىڭ مينسكىدەگى موينىنا العان مىندەتتەمەلەرى – ۋكراينانى مازالاعان جىكشىلدەردى قولداۋدى بىردەن توقتاتۋ جاعىن قامتىدى»، - دەدى.

اقش پرەزيدەنتى ۋكرايناداعى داعدارىستى مينسك كەلىسىمدەرىن بارلىق تاراپتىڭ  بۇلجىتپاي ورىنداۋ ارقىلى، ديپلوماتيالىق جولمەن شەشۋدىڭ ماڭىزدىلىعىنا ايرىقشا نازار اۋدارعان. پرەزيدەنت وباما كەلەسى ماڭىزدى قادام رەتىندە ۋكرايندىق دونباسستا ەقىۇ تالاپتارىنا ساي كەلۋى ءتيىستى جەرگىلىكتى سايلاۋ وتكىزۋدى اتاعان.

ەكى ەل باسشىسى بۇۇ سيرياعا ارنالعان 2254 قارارىن ورىنداۋدىڭ  قاجەتتىلىگى تۋرالى پىكىر الماستى. 

كرەملدىڭ حابارلاۋىنشا، پۋتين مەن وباما سونىمەن بىرگە يران مەن ساۋد ارابياسىنىڭ اراسىنداعى شيەلەنىستى توقتاتۋ كەرەك دەگەن ۇيعارىم جاساعان. 

تەلەفونمەن اڭگىمە بارىسىندا ەكى جاقتىڭ اسكەري سالاداعى بايلانىستارى، تاياۋ شىعىستاعى تەررورمەن كۇرەس ماسەلەلەرى دە تالقىلانعان. كحدر  باسشىسىنىڭ سۋتەگى بومباسىن سىناقتان وتكىزگەنى تۋرالى مالىمدەمەسىنە وراي، اقش پەن رەسەي پرەزيدەنتتەرى ەگەر بۇل جايت دالەلدەنسە ول بۇۇ قاۋىپسىزدىك كەڭەسى قارارىن ورەسكەل بۇزۋ  بوپ تابىلاتىنىن جانە حالىقارالىق قاۋىمداستىقتىڭ قاتاڭ جاۋابىنسىز قالماۋ كەرەكتىگىن ۇيعارعان.

اباي-اقپارات