قىرعىزستاندا رەسەيدىڭ «ءبىرىنشى كانال. بۇكىلالەمدىك جەلى» جانە ۆگترك (رتر) كانالدارىنا ەرەكشە مارتەبە بەرەر كەزدە قوعامدىق پىكىر ەسەپكە الىنادى.

وسىلاي دەپ ازاتتىققا ۇكىمەتتىڭ اقپاراتتى قامتاماسىز ەتۋ ءبولىمىنىڭ باسشىسى نازيرا احمەدوۆا حابارلادى.

«بۇل ەكىجاقتى كەلىسىم، سول سەبەپتەن بۇل قۇجات قوعامدىق تالقىلاۋعا جاتپايدى. ۇكىمەت قۇجات جوباسىن قاراپ بولعان سوڭ، ماقۇلداۋ نەمەسە كەرى قايتارۋ جونىندە شەشىم شىعارادى. اتالعان جوبا رەسەي تاراپىنان ۇسىنىلدى. قىرعىز تارابى ءالى قارامادى. ەگەر قىرعىزستان قوعامى اتالعان جوباعا قارسى شىقسا، ۇكىمەت ارينە، شەشىم قابىلدار كەزدە، قوعامنىڭ پىكىرىن ەسكەرەدى»، - دەدى احمەدوۆا.

قۇجات جوباسى 2016 جىلدىڭ 6 قاڭتارىندا قىرعىزستاننىڭ مادەنيەت، اقپارات جانە تۋريزم مينيسترلىگى تاراپىنان قوعامدىق تالقىلاۋعا سالىندى. وسىدان كەيىن قىرعىزستان قوعامى بىردەن بۇل كەلىسىمگە قارسى شىقتى.

ەگەر اتالعان جوبا كەلىسىلگەن جاعدايدا قىرعىزستان مەن رەسەي «ءبىرىنشى كانال» جانە رتر تەلەكانالدارىنا قىرعىز ەلىندە ەرەكشە مارتەبە بەرەدى. وعان قىرعىزستاننىڭ شەتەلدىك باق جونىندەگى زاڭى جۇرمەيدى، سونىمەن بىرگە ورىس ءتىلىن جانە ورىس كونتەنتىن پايدالانۋدا شەكتەۋ قويىلمايدى.

اباي-اقپارات