"يسلام مەملەكەتىنە" قارجىلاي كومەك كورسەتكەنى ءۇشىن ەكى رەسەيلىك ستۋدەنت قىز بەس جىلعا باس بوستاندىقتارىنان ايىرىلدى.

استراحان قالاسىنداعى مەديتسينا ينستيتۋتىندا وقيتىن ەلەنا ارشاحانوۆا جانە سايدا حاليكوۆا ۇيگە قاجەت بۇيىمدار مەن قولدان جاسالعان سابىن ساتۋدان تۇسكەن اقشانى يم ەسەپشوتتارىنا اۋدارىپ وتىرعان دەپ ايىپتالدى. بىلتىرعى جىلدىڭ جەلتوقسانىنان بەرى قاماۋدا وتىرعان حاليكوۆا شامامەن 43 مىڭ رۋبل جولدادى دەلىنەدى. ونىڭ ادۆوكاتى بۇل اقشالاردىڭ مۇقتاج جاندارعا كومەكتەسەتىن يسلام قايىرىمدىلىق ۇيىمدارىنا ارنالعانىن ءۋاج ەتۋدە.

سوت وكىلى يرينا جيرنوۆانىڭ ايتۋىنشا، ەكى قىز دا كىنالارىن مويىنداعان. حاليكوۆانىڭ اناسى قىزىنىڭ تەرگەۋ بارىسىنداعى قىسىمعا شىداماي قول قويعانىن ايتادى.

بيلىك ورىندارىنىڭ مالىمەتىنشە، يراك پەن سيريادا يم جاعىندا 2 900-گە جۋىق رەسەيلىك سوعىسىپ جاتىر. رەسەيلىك ۇلتتىق تەررورعا قارسى كوميتەت 2014 جىلى ەلگە 214 كۇدىكتى سسودىردىڭ قايتىپ كەلگەنىن، ونىڭ 41-ءى تۇتقىندالعانىن حابارلادى.

Abai.kz