قىرعىزستاندا ءوزىنىڭ ەكى ارىپتەسىنە وق اتقان ۇلتتىق گۆارديا ساربازى اسكار مەيكين ۋلۋ تۇتقىنعا الىندى. بۇل جونىندە ازاتتىققا باس پروكۋراتۋرا وكىلى نۇرلان تاعاەۆ حابارلادى.

28 جەلتوقساندا №714 اسكەري ءبولىمنىڭ كۇزەتىندە تۇرعان سارباز ەكى قىزمەتتەسىن اتقان. بىرەۋى قازا تاۋىپ، ەكىنشىسى اۋىر حالدە اۋرۋحاناعا جاتقىزىلعان. اتالعان وقيعا بويىنشا، اسكەري پروكۋراتۋرا قىلمىستىق ءىس قوزعاعان.

«ادام ءولتىرۋ»، «قىزمەتىن اسىرا پايدالانۋ»، «نەمقۇرايدىلىق» باپتارى بويىنشا ءىس قوزعالدى. تەرگەۋ توبى قۇرىلىپ، تەكسەرۋ باستالدى»، - دەدى تاعاەۆ. 

ۇلتتىق گۆارديانىڭ تاربيە ءىسى بويىنشا باسقارما باسشىسى تاالاي مىرزاباەۆتىڭ سوزدەرىنشە، وقيعا تاڭعى ساعات تورتتەردىڭ كەزىندە بولعان.

«№714 اسكەري ءبولىمنىڭ سەرجانتتارى قارۋلانعان جاۋىنگەرگە شابۋىل جاساعان. ول وق اتۋعا ءماجبۇر بولعان. ناتيجەسىندە سەرجانت ازامات ۋلۋ اسىلبەك 4-اۋرۋحانادا كوز جۇمدى. ەكىنشى سەرجانتقا وپەراتسيا جاسالىنىپ، قازىر جانساقتاۋ بولىمىندە جاتىر»،- دەپ حابارلادى مىرزاباەۆ

Abai.kz