...جىلداعىداي تاۋەلسىزدىك كۇنىندە 200-دەن استام ادامعا ءارتۇرلى دارەجەدەگى مەملەكەتتىك ماراپاتتار تاراتىلدى. ءتىپتى، ەكونوميكاسى ەتپەتىنەن قۇلاپ، ەسىنەن تانىپ  جاتقان ەلىمىزدە «ەكونوميكاداعى جاڭالىقتار اشقانى» ءۇشىن اقساقال اكادەميك تە كەۋدەسىنە وردەن تاقتى...

تەك، ءال-اۋقاتىمىزدى ويسىراتقان كارىم ءماسىموۆ-پەن تەڭگەمىزدى تەنتىرەتىپ جىبەرگەن قايرات كەلىمبەتوۆ, دانيار اقىشەۆ-تارعا مەملەكەتتىك سىيلىق «جەتپەي قالىپ»، ابىروي بولدى. بىراق، جاڭا جىلدان باستاپ ناندى قىمباتتاتۋعا بەل شەشىپ، جەڭىن ءتۇرىپ جۇرگەن اۋىلشارۋاشىلىعى ءمينيسترى اسىلجان مامىتبەكوۆ-ءتىڭ ماراپاتشىلاردىڭ اراسىندا جىميىپ جۇرگەنىن كوزىمىز شالىپ قالعانداي...

ءبىر شوعىر ونەر ولكەسىنىڭ ادامدارى «قازاقستاننىڭ ەڭبەك سىڭىرگەن قايراتكەرى» اتاعىنا قول جەتكىزدى. بىراق، ءبىر «نۇر-مۇقاسان» توبىنىڭ ءانشىسى مۇقاسان شاحزاداەۆ-قا بۇيىرعان اتاقتىڭ، ونىڭ ومىردەگى ءھام ونەردەگى «ەگىزى» نۇرلان قونىسباەۆ-قا قولجەتىمسىز بولىپ قالعانىنا قايران قالدىق؟!. الدە، ءان شىرقاعاندا، مۇقاسان قاتتىراق قىشقىرا ما ەكەن؟!.

مەنىڭ جەرلەس ءىنىم تۇرسىنبەك قاباتوۆ ءوز تەاترىن قۇرعان 5 جىلدا «ەڭبەك ءسىڭىرىپ» ۇلگەرگەن بولسا; 20 جىلدان بەرى قازاق ساحناسىنىڭ وتىمەن كىرىپ، كۇلىمەن شىققان «شانشارداعى» ۋاليبەك ابدىرايىم­وۆ پەن ءجۇسىپ اقشوراەۆ­-تىڭ ءالى كۇنگە دەيىن «ەڭبەك سىڭىرە» الماعانى قالاي؟!.

قازاق انىنە الەمدىك مۋزىكانىڭ بوياۋلارىن اسقان شەبەرلىكپەن ۇيلەستىرىپ، قازاقتىڭ ەسترادا جۇلدىزى روزا رىمباەۆا مەن قوسىلىپ ءان شىرقاعان تالانتتى كومپoزيتور، ءانشى، اتى الەمگە تانىمال قازاق بالۋانى قاجىمۇقان مۇڭايت­پاسوۆ-تىڭ تۋعان نەمەرەسى باقىتجان قاجى­مۇقانوۆ-تىڭ ەرەن ەڭبەگىنەن - «تۇركىۆيجەن» حالىقارالىق بايقاۋىندا جالعىز ءان شىرقاپ، باس بايگە العان جاس ءانشى جانار دۇعالوۆا-نىڭ ەڭبەگى ارتىق نەمەسە باسىم بولىپ پا؟!. ەگەر «تۇركىۆيجەن» حالىقارالىق بايقاۋىنا باقىتجان قاجىمۇقانوۆتىڭ تابانى تيسە، وزىنەن باسقا ەشكىمگە جۇلدە دە تيمەي قالار ەدى... قازاقتىڭ ەسترادا ونەرىنىڭ دەڭگەيى تۇركى دۇنيەسىندەگى ءبىر دۇركىن جەڭىسپەن ولشەنبەۋگە ءتيىس.

ءبىز قازاقتىڭ ەشبىر ونەرىن ەۋروپالىق ولشەممەن دە، تۇركىلىك دارەجەمەن دە ولشەپ-ەكشەپ، دامىتا المايمىز. بىزگە كەرەگى - تابيعي تالانتى سەمسەردەي جارقىلداعان شىنايى ساڭلاقتار...

بۇگىنگىدەي تۇيسىكپەن الالاپ-قارالاي بەرسەك، قاپتاعان قايراتى جوق «قايراتكەرلەردەن» كوشەدە اياق الىپ جۇرە المايتىن بولامىز...

قاجىمۇقان عابدوللا

Abai.kz