«باقىتتىڭ» كەرمەك ءدامى...
...سۇحبات بولدى. ۇستەلدى قورشاعان ءۇش قازاق...
ادەتتەگىدەي اۋەلەگەن ءان دە، ورشىگەن ولەڭ دە جوق. قىلمىڭداعان قىزدان دا، جىلمىڭداعان ءازىل-وسپاقتان دا ادا وزەگى وزدىگىنەن قازاق تىلىندە ورىلگەن، ۇلتتىڭ ءالسىز، ەلدىڭ ءنارسىز نارسەلەرى ايتىلعان انا تىلىمىزدەگى اڭگىمە-دۇكەن...
...تەك، تاۋەلسىزدىگىمىزدىڭ شىناي باتىرلارىنا - جەلتوقسان وقيعاسىنا قاتىسۋشىلارعا 30 جىل تولاتىن تورقالى داتادا قانداي قامقورلىق پەن قۇرمەت كورسەتىلەتىنى تۇسىنىكسىز قالدى...
...قازاقتىڭ شىن تاريحىن جازۋدىڭ قاجەتتىگىن قازاق حاندىعىنىڭ 550 جىلدىق مەرەيتويىنا 700-گە تاياۋ شارا وتكىزىپ بارىپ، تۇپكىلىكتى ءتۇسىنىپپىز... ايتكەنمەن، وسىناۋ ۇلتتىڭ بولاشاق تاعدىرىنا، ەلدىڭ مۇددەسىنە تىكەلەي قاتىستى اۋقىمدى دا اۋىر شارۋانى جۇزەگە اسىرۋ، ياعني، قاعازعا ءتۇسىرۋ (جازۋ، باسۋ) - قوينى-قونىشىندا جەردىڭ كۇللى قازىنا-بايلىعى مەن قىرۋار قارجىلارى بار بيلىكتىڭ ەمەس; جالاڭاياق، جالاڭباس زيالى قاۋىمنىڭ مىندەتى ەكەن؟!.
...جاسىل تەحنولوگيا جاساۋعا كەتكەن (ەكسپو) 270 ميلليارد اقش دوللارى كولەمىندەگى قىرعىن قارجى «ەش وكىنبەيتىن»، ەلەڭدەۋگە تۇرمايتىن بولماشى نارسە كورىندى؟!.
«...استاناداعى باياعىدا ادامنىڭ بويىنان اسىپ ءوسىپ تۇرعان قامىستى باتپاقتىڭ ورنىندا بۇگىن اقوردا جارقىراپ تۇر...» (استانا قالاسىنىڭ سالىنۋى تۋرالى)
«...پروتوننىڭ زياندى... ازىرگە ءبىز زىمىران جاساي المايمىز، بايقوڭىردى ۇستاپ تۇراتىن كادرلاردى دايىنداي المايمىز. كەزىندە ورىستارمەن كەلىسىمگە كەلمەگەندە، بايقوڭىر جاي قىزىلوردادا ءبىر قۇم بولىپ قالار ەدى...»
باسقا تەلەارنادا: سىر بويىنىڭ پەرزەنتى، تانىمال زىلتەمىرشى يليا يلين شەتەلدە ءجۇرىپ، گروزنىيدا وتكەن رەسەي پرەزيدەنتى ۆ.پۋتين اتىنداعى كۋبوكتىڭ باس جۇلدەسىن جۇلىپ-جەڭىپ الىپ (كۋبوك جۇلدەسىنىڭ مولشەرى 5 مىڭ اقش دوللارى كولەمىندە. قازاقستاندا، مىسالى، بۇل سومانى ماقتارال اۋدانىنىڭ اكىمى اتىنداعى جارىستا دا الۋعا بولادى), ەلىمىزدىڭ ەسكى ءانۇرانى قويىلعاندا، جۇلقىنىپ، ءبىزدىڭ جاڭا، ناقتى ءانۇرانىمىزدىڭ قويىلۋىن تالاپ ەتىپ، ورىنداتىپ جاتتى...
...بىزدە ءبارى بۇرىنعىداي...
«...ءبىز رەسەيمەن دە، تۇركيامەن دە دوسپىز، ەشكىمنىڭ جاعىن جاقتامايمىز...»
باسقا تەلەارنادا: ليتۆا مەملەكەتىنىڭ راديو جانە تەلەديدار كوميسسياسى ەلدەگى ءورىستىلدى «رتر-پلانەتا» تەلەارناسىندا رەسەي دۋماسىنىڭ جۇيكەسى توزعان سىرقات دەپۋتاتى ۆلاديمير جيرينوۆسكيدىڭ تۇرىكتەردى «جابايى حالىق» اتاپ: «ورىستىڭ ولگەن ءاربىر سولداتىنىڭ ورنىنا ءجۇز تۇرىكتى ءولتىرىپ، كومۋ كەرەك» - دەگەن ساندىراعى ءۇشىن ءورىستىلدى تەلەارناعا سانكتسيا جاريالاپ، اقىلى پاكەت قالپىنا اۋىستىردى. ەگەر تەلەارنا تاعى دا سوعىس پەن بۇلىنشىلككە شاقىراتىن ناسيحات ايتسا، ليتۆادا تەلەكانالدىڭ باعدارلامالارى مۇلدەم جابىلاتىن بولادى...
...بىزدە ءبارى بۇرىنعىداي...
«...ءبىز سەكسەن ميللليوندىق تۇرىك ەمەسپىز. ءجۇز ەلۋ ميلليون ورىس تا ەمەسپىز. ات توبەلىندەي ەلمىز. ەگەر ءبىز 11-12 ميلليونعا جەتكەن قازاقتى قىرىق رۋعا بولەتىن بولساق، بىت-شىت بولامىز. قازاق بىرىككەندە، اڭىراقايدا دۇشپاندارىن تىقسىردى. ول جەردە ەشكىم ءبىر-ءبىرىنىڭ رۋىن سۇراعان جوق...»
باسقا تەلەارنادا: ۋكراينا پرەزيدەنتى پەتر پوروشەنكو ۇلتتىق قاۋىپسىزدىككە نۇقسان كەلتىرەتىن ارەكەتتەر ءۇشىن كەز-كەلگەن ۋكرايندىقتان جەدەل تۇردە ازاماتتىقتى تارتىپ الۋ قاجەتتىگىن مالىمدەدى...
...بىزدە ءبارى بۇرىنعىداي...
...تولىقتاي جەكەشەلەندىرۋدىڭ جۇرمەگەندىگىنىڭ كەسىرىنەن جاس مەملەكەتكە قۇرىلعان ۇلتتىق حولدينگتەر - كەرەكتى قادامنىڭ ءبىرى «بولىپ شىقتى»؟!. قوعام بەلسەندىسى مۇحتار تايجان باۋىرىم: «وبيجاتسيا نا كۋرس - ۆسە راۆنو، چتو وبيجاتسيا نا زەركالو...» - دەپ قالدى...
«...پارا الۋشى بار، پارا بەرۋشى بار. ءبىز پارا بەرۋدى توقتاتپاساق، ولار دا الا بەرەدى. بارلىق جەردە جەمقورلىق بار. جەمقورلىق تۋرالى زاڭنىڭ جاڭا جوباسىنا سالىق الۋدىڭ دا شارتتارىن جازىپ قويدىق. بىرەۋ سىيلىق بەرگىسى كەلە مە - ونى ساتىپ ال...»
سۇقبات اياقتالۋعا تايادى... «...ءبىز ءولىپ-ءوشىپ وسى زامانعا جەتتىك... ءبىزدى سىرتتان الاتىن جاۋ جوق. نامىستى قولدان بەرمەيتىن حالىقپىز عوي، بىرلىگىمىز بولسا، بارىنە جەتەمىز. قازاق ءوزىنىڭ تاريحىندا ءداپ بۇگىنگىدەي باقىتتى ءومىر سۇرگەن جوق...»
...كوشەگە شىعىپ، كولىگىممەن كەتىپ بارا جاتىپ ۆاليۋتا ايىرباستاۋ تاقتاسىنا كوزىم ءتۇستى: كەشە عانا 1 اقش دوللارى - 314 تەڭگە ەدى، بۇگىن 340 تەڭگەگە اسپانداپ كەتىپتى...
«... قازاق ءداپ بۇگىنگىدەي باقىتتى ءومىر سۇرگەن جوق...»
«باقىتتىڭ» كەرمەك ءدامى...
قاجىمۇقان عابدوللا
Abai.kz
