بۇگىن تاۋەلسىزدىك كۇنى قارساڭىندا استانا قالاسى اكىمدىگىنىڭ قولداۋىمەن قازاقستانداعى تۇڭعىش وتاندىق ونىمدەردى ساتۋ ورتالىعى اشىلدى. ەلوردا اكىمى ادىلبەك جاقسىبەكوۆ «ۋنيۆەرMAG.kz» قازاقستاندىق تاۋار وندىرۋشىلەر دۇكەنىنىڭ العاشقى ساتىپ الۋشىلارىنىڭ ءبىرى بولدى.

قازاقستاندىق جەڭىل ونەركاسىپ سالاسىنىڭ وكىلدەرى ءبىر ساۋدا الاڭىندا العاش رەت بىرىكتىرىلىپ وتىر. جاڭا دۇكەننىڭ سورەلەرىنەن ءۇي توقىماسى مەن بالالار كيىمىنەن باستاپ، ەرلەر مەن ايەلدەرگە ارنالعان ىسكەرلىك كوستيۋمدەرگە دەيىن، ۇلتتىق كيىمدەر، باس كيىم مەن اياق كيىم، شۇلىق ونىمدەرى، سپورتتىق كيىمدەر ورىن تاپتى.

ءا. جاقسىبەكوۆ كاسىپكەرلەردى دۇكەننىڭ اشىلۋىمەن قۇتتىقتاپ، وتاندىق بيزنەستى دامىتۋ جانە قالىپتى باسەكەلەستىك ءۇشىن جاعداي جاساۋدىڭ ماڭىزدىلىعىن اتاپ ءوتتى. «بۇل دەر كەزىندە قابىلدانعان شەشىم. مەملەكەت باسشىسى قازاقستاندىق قۇرامدى ۇلعايتۋعا ءاردايىم ەرەكشە نازار اۋدارىپ كەلەدى. ءبىزدىڭ وندىرۋشىلەر جاڭا ساپالى دەڭگەيگە كوتەرىلىپ، قازاقستاندىقتارعا ساپاسى جاعىنان شەتەلدىك تاۋارلاردان ارتىق بولماسا، كەم تۇسپەيتىن ءوز ونىمدەرىن ۇسىنۋدا. بارشاڭىزدى قۇتتىقتايمىن!»،– دەدى قالا باسشىسى.

ورتالىق جۇمىسىن باستاعان كۇنى 25 ءوندىرۋشى ءوز ونىمدەرىن ساتىلىمعا شىعارىپ ۇلگەردى. سولاردىڭ ىشىندە ساڭىراۋلار قوعامى نەكە كويلەكتەرى مەن ۇلتتىق كيىمدەرىن ساتىلىمعا شىعارسا، استانالىق شۇلىق فابريكاسى مەن كيىز كومبيناتى، قاراعاندىلىق اياق كيىم فابريكاسى، شىمكەنتتىك «التىن ادام» ىسكەرلىك كوستيۋمدەر تىگۋ فابريكاسى، اتىراۋلىق تريكوتاج ونىمدەر فابريكاسى، سەمەيلىك جەيدەلەر تىگۋ فابريكاسى، الماتىلىق باس كيىمدەر فابريكاسى جانە ت.ب. ءوز ونىمدەرىن ۇسىنۋدا. الداعى ۋاقىتتا قازاقستاندىق باسقا دا كومپانيالاردىڭ كەلۋىنە قاراي «ۋنيۆەرMAG.kz» دۇكەنىن كەڭەيتۋ جوسپارلانعان. اتاپ ايتقاندا، ەرلەرگە جانە ايەلدەرگە ارنالعان زالدار جانە توقىما مەن كيىم-كەشەك بولىمدەرى بولەك بولادى.

امبەباپ دۇكەننىڭ اۋدانى، قويمالارىن قوسا العاندا - 240 شارشى مەتر. دۇكەندە بىرىڭعاي كاسسا جۇمىس ىستەيدى. جۇمىس ىستەۋ كەستەسى: كۇن سايىن ساعات 10:00 - 21:00-گە دەيىن دەمالىسسىز جانە ءۇزىلىسسىز.

كاسىپكەرلەردىڭ ايتۋىنشا، جاقىن ارادا دۇكەننىڭ سايتىندا ءتيىستى قىزمەت ارقىلى روبوت-كەڭەسشىمەن (قازاقستاندا قۇراستىرىلعان) ساتىپ الۋشىلار ءۇشىن ونلاين-ەكسكۋرسيا وتكىزىلەدى.

تاۋەلسىزدىك كۇنىنە جانە ساتۋ ورتالىعىنىڭ اشىلۋىنا وراي بارلىق قازاقستاندىق تاۋار وندىرۋشىلەر قايىرىمدىلىق اكتسياعا قاتىسادى. تاۋارلاردىڭ ءبىر بولىگى، ويىنشىقتار، مەكتەپ فورماسى، اياق كيىم مەن شانالار استانا قالاسىنىڭ بالالار ۇيىنە جونەلتىلەدى.

امبەباپ دۇكەننىڭ مەكەن جايى: استانا ق.، كۇمىسبەكوۆ ك-ءسى 3ا.

Abai.kz