جيىندى وڭتۇستىك قازاقستان وبلىستىق سوتىنىڭ توراعاسى نۇرسەرىك كارىمۇلى ءشارىپوۆ اشىپ، وتستاۆكاعا شىعىپ وتىرعان سۋديالاردى قۇتتىقتاۋ بارىسىندا ولاردىڭ كاسىپقويلىعىن جانە وبلىس سوت جۇيەسىنىڭ دامۋىنا قوسقان سۇبەلى ۇلەستەرىن اتاپ ءوتتى. توراعا ءوز سوزىندە: «سىزدەر كوپ جىلدار بويى سۋديالىق قىزمەتتى ابىرويمەن اتقارىپ، ەڭبەكتەرىڭىز مەملەكەتتىك، ۆەدومستۆولىق ناگرادالارمەن اتاپ وتىلگەن جانە سىزدەردىڭ سوت بيلىگىنە ەتكەن قىزمەتتەرىڭىزگە قاراپ، جاس سۋديالار ءتالىم-تاربيە الادى. الداعى ۋاقىتتا سىزدەر ۇجىممەن بايلانىستا بولىپ، جاس سۋديالار مەن ماماندارعا كەڭەستەر بەرىپ، ءوز تاجىريبەلەرىڭىزبەن بولىسەدى دەگەن ويدامىن جانە بۇدان بىلاي دا ەلىمىزدىڭ سوت جۇيەسىن جەتىلدىرۋگە ۇلەستەرىڭىزدى قوسا بەرەدى دەگەن سەنىمدەمىن»، - دەدى.

وبلىستىق سوتتىڭ توراعاسى ن.ءشارىپوۆ ى.ماتىباەۆ پەن س.ماميرايموۆقا سۋديالار قوعامداستىعىنىڭ الدىنداعى ەرەكشە قىزمەتى، سوت تورەلىگىن نىعايتۋعا ىقپال ەتەتىن قوعامدىق جانە سوت قىزمەتى ءۇشىن "قر سۋديالار وداعىنىڭ قۇرمەتتى مۇشەسى"  قۇرمەت بەلگىسىن تاپسىردى.

ودان كەيىن ب.بوتابەكوۆكە، ن.قويشىعۇلوۆاعا، ى.ماتىباەۆقا جانە س.ماميرايموۆقا ۇجىم اتىنان گۇل شوقتارى مەن ەستەلىك سىيلىقتار تاپسىرىلدى.

سونىمەن قاتار، سالتاناتتى ءىس-شارا بارىسىندا وبلىستىق سوتتىڭ قىلمىستىق ىستەر جونىندەگى اپەللياتسيالىق سوت القاسىنىڭ توراعاسى ز.ءپىرنياز، ازاماتتىق جانە اكىمشىلىك ىستەر جونىندەگى اپەللياتسيالىق سوت القاسى توراعاسىنىڭ م.ا. ن.بيبولوۆ، وقو سۋديالار وداعى فيليالىنىڭ توراعاسى ت.بەكىمبەتوۆ، وقو سوتى كەڭسەسىنىڭ باسشىسى و.لەشتاەۆ جانە وبلىستىق سوتتىڭ ارداگەرلەر كەڭەسىنىڭ مۇشەسى م.ءامىروۆ سۋديالاردى قۇتتىقتاپ، جىلى لەبىزدەرى مەن تىلەكتەرىن ايتتى.

جيىن سوڭىندا قۇرمەتتى دەمالىسقا شىعىپ وتىرعان سۋديالار ۇجىم تاراپىنان ۇيىمداستىرىلىپ وتىرعان وسى ءىس-شارا مەن سىي-سياپاتتارعا ءوز العىستارىن ءبىلدىرىپ، ارىپتەستەرىنە سوت تورەلىگىن ىسكە اسىرۋدا جەتىستىكتەر تىلەدى.