رۋبتسوۆسك رەفەرەندۋم ارقىلى قازاقستانعا قوسىلۋدى سۇراپ جاتىر

رەسەيدىڭ التاي ايماعىنىڭ تۇرعىندارى رۋبتسوۆسك قالاسىن قازاقستانعا قوسۋدى سۇراپ جاتىر،-دەپ جازادى «informburo.kz» پورتالى.

رەسەيلىكتەر رۋبتسوۆسك قالاسىندا رەفەرەندۋم وتكىزىپ، رف-نىڭ التاي ايماعىنا قارايتىن اتالمىش قالانى قازاقستاننىڭ قۇرامىنا قوسۋدى سۇراپ جاتىر ەكەن. بۇل تۋرالى اۋەلى التايلىقتار رەسەيلىك باق-تا ماسەلە كوتەرىپتى.  

باستاما كوتەرگەن رەسەيلىك بەلسەندىلەر قازاقستان پرەزيدەنتى نۇرسۇلتان نازارباەۆتىڭ اتىنا ارنايى پەتيتسياعا قول جيناپ، رۋبتسوۆسك قالاسى رف قۇرامىنان رەفەرەندۋم ارقىلى ءبولىنىپ شىققان  جاعدايدا استانا رەسەيلىك قالانىڭ قازاقستان قۇرامىنا قوسىلۋىن دەرەۋ راتيفيكاتسيالاۋدى سۇرايدى-مىس.

«اتالعان باستامانى كوتىرەپ وتىرعان رەسەيلىك بەلسەندىلەر (اتى-جوندەرى كورسەتىلمەگەن – رەد.) قىرىم رەفەرەندۋمىنان كەيىن وسىنداي ويعا كەلۋ مۇمكىن. وزگە مەملەكەتتىڭ بۇتىندەي ءبىر ايماعى رەسەي قۇرامىنا قوسىلىپ كەتكەن ەدى عوي»،-دەپ جازادى «كاپيتاليست».

ينتەرنەت-جۋرنالدىڭ جازۋىنشا رۋبتسوۆسك قالاسىنداعى قازىرگى جاعداي كوڭىل قونشىتارلىق ەمەس.

رەسەيلىك ينتەرنەت-جۋرنال «كاپيتاليستىڭ» دەرەكتەرىنە سۇيەنسەك, قالا بيۋدجەتىنىڭ قارا تەسىگىن جاماۋ ءۇشىن جەرگىلىكتى باسشىلار رف ۇكىمەتىنەن 100 ميلليون رۋبل كولەمىندە نەسيە الماق ەكەن.

رەداكتسيادان: بۇل ماقالانى بەرۋدەگى ماقساتىمىز قوس بىردەي ەكونوميكالىق وداققا مۇشە مەملەكەتتەر (قازاقستان مەن رەسەي)  اراسىنا وت تاستاۋ ەمەس، رەسەيلىك اقپارات كوزدەرىنىڭ رۋبتسوۆسكتەگى جاعدايلارعا قاتىستى جازعان ماتەريالىن وقىرمانعا ۇسىنۋ. جالپى حالىقتىق رەفەرەندۋم وتكىزۋ ارقىلى ءبىر وبلىستى قازاقستان قۇرامىنا قوسۋعا بولاتىن شىعار. وندايدى رەسەيلىك تاجىربيەدەن كورگەن ەدىك (قىرىمنىڭ رف قۇرامىنا قوسىلۋى – رەد.). بىراق، ونىڭ اقىرى قانداي جاعدايلارعا اكەلىپ سوقتىراتىنىن دا ەسكەرگەن ابزال. اسىرەسە، قازىرگىدەي ەكونوميكالىق قىسىلتاياڭ جاعدايدا بۇل قازاقستان ءۇشىن پايدالى ما؟ رۋبتسوۆسك بىزگە كەرەك پە؟

نۇرزات توعجان

Abai.kz