بۇگىن الماتى وبلىسىنىڭ اكىمى اماندىق باتالوۆ ۇلى جەڭىس مەرەكەسى قارساڭىندا سوعىس ارداگەرلەرى مەن تىل ەڭبەككەرلەرىن قابىلدادى. جيىنعا 100 ارداگەر قاتىستى.

- قۇرمەتتى ارداگەرلەر! جىل سايىن وزدەرىڭىزبەن كەزدەسۋ داستۇرگە اينالىپ كەلەدى. سىزدەرگە قۇرمەت كورسەتۋ، وزدەرىڭىزبەن جۇزدەسۋ – ءبىز ءۇشىن ۇلكەن عانيبەت. تەك قانا، كوڭىلىمىزدى الاڭداتاتىنى – ەل تىنىشتىعىن قورعاعان ارداگەرلەردىڭ ازايىپ بارا جاتقانى.

ۋاقىت الماسادى، ۇرپاقتار وزگەرەدى، بىراق سىزدەرگە دەگەن قۇرمەت، وتانعا دەگەن سۇيىسپەنشىلىك ەشقاشان وزگەرمەيدى. بۇگىنگى بەيبىت، باقىتتى ءومىرىمىز – سىزدەردىڭ ارقالارىڭىز. ەرلىكتىڭ شەجىرەسى بولعان سىزدەرگە مىقتى دەنساۋلىق، ۇزاق عۇمىر، وتباسىلارىڭىزعا باقىت، جاقسىلىق تىلەيمىز! – دەدى ءوز قۇتتىقتاۋىندا وبلىس اكىمى ا. باتالوۆ.

مۇنان سوڭ وبلىس اكىمى جاسى جۇزدەن اسقان ۇلى وتان سوعىسىنىڭ ارداگەرلەرى رابات تەگىسباەۆ پەن كۇرشىبەك كوجەكباەۆقا جانە تىل ەڭبەككەرى زاۋرە باەۆانىڭ يىعىنا شاپان جاپتى.

ۇلى جەڭىس مەرەكەسىمەن قۇتتىقتاۋعا ارداگەرلەر دە تىلەك ءبىلدىرىپ، توقتارباي قاناپيانوۆ، ميحايل پريادۋحين جانە نۇربەك قاسىمبەكوۆ ءسوز الدى. ولار ەل باسىنا كۇن تۋعان شاقتا قيىن كۇندەردى باستان كەشىرگەنىن، دەگەنمەن ۇيىسا كۇش بىرىكتىرۋدىڭ، وتانعا دەگەن قالتقىسىز سۇيىسپەنشىلىكتىڭ ارقاسىندا جەڭىسكە جەتكەندەرىن اتاپ ءوتتى. «ەندىگى ءبىزدىڭ باستى قۇندىلىعىمىز – تاۋەلسىزدىگىمىز، «ماڭگىلىك ەل» ۇلتتىق يدەياسىن جۇزەگە اسىرۋ. وسى جولدا ءبىز، ارداگەرلەر، سىزدەرگە ۇنەمى قولداۋ بىلدىرەمىز»، - دەدى ءوز سوزدەرىندە.

ارداگەرلەردىڭ اق تىلەك، ىستىق ىقىلاستارىنا ريزاشىلىعىن بىلدىرگەن وبلىس اكىمى ا. باتالوۆ 9 مامىر – جەڭىس كۇنىن اتاپ ءوتۋ باعدارلاماسىنان حاباردار ەتىپ، قاتىسۋشىلاردى سالتاناتتى تۇسكى اسقا شاقىردى.

ءسۇيىنباي اتىنداعى وبلىستىق فيلارمونيانىڭ ونەرپازدارى شىرقاعان اسكەري اندەر مەرەكەلىك شارانىڭ ءارىن كىرگىزدى.

جالپى، بۇگىنگى كۇنى وبلىستا 257 سوعىس ارداگەرى، 20 مىڭنان استام تىل ەڭبەككەرلەرى بار. سالتاناتتى قابىلداۋعا شاقىرىلعان ارداگەرلەردىڭ ارقايسىسىنا 70 مىڭ تەڭگەدەن اقشالاي سىيلىق بەرىلدى.

مەملەكەت باسشىسىنىڭ تاپسىرماسىنا سايكەس وڭىردە ارداگەرلەردىڭ تۇرعىن ءۇي-كوممۋنالدىق جاعدايىن جاقسارتۋعا، ماتەريالدىق كومەك كورسەتۋگە ەرەكشە كوڭىل بولىنەدى.

جەڭىس مەرەكەسىنە وراي مايدانگەرلەرگە 150 مىڭ تەڭگە كولەمىندە ءبىر رەتتىك قارجىلاي جاردەماقى بەرىلەدى.

سوعىس ارداگەرلەرىنە، تىل ەڭبەككەرلەرىنە، سونداي-اق سوعىسقا قاتىسۋشىلارعا تەڭەستىرىلگەندەرگە دەنساۋلىقتارىن ساۋىقتىرۋ ءۇشىن بيۋدجەتتەن 112,5 ملن. تەڭگە قاراستىرىلدى.

ارداگەرلەردى ءتۇرلى قوسىمشا قۇرالدارمەن قامتۋ ماقساتىنا 1 ميلليارد 267 ميلليون تەڭگە ءبولىندى.

Abai.kz