كەشە استانادا وتكەن جيىن كەزىندە نۇرسۇلتان نازارباەۆ جاڭا اقپارات جانە كوممۋنيكاتسيا مينيسترلىگىن قۇرۋ تۋرالى ايتا كەلىپ: «اقپاراتتىق ساياساتقا كەلەر بولساق، بۇل فۋنكتسيا قازىر باسقا مينيسترلىكتىڭ قۇزىرىندا تۇر. ۇكىمەتتە بۇل سالانى ۇيلەستىرىپ وتىرعان ەشكىم جوق، اقپاراتتىق جۇمىسقا بولىنگەن مەملەكەتتىك اقشا قايدا كەتىپ، قايدان كەلىپ جاتقانىن ەشكىم باقىلاپ وتىرعان جوق. سوندىقتان، بەس رەفورمانىڭ ورىندالۋ بارىسىن ءتيىمدى تاراتۋ ءۇشىن، قازىرگى اقپاراتتىق قاۋىپ-قاتەرلەردىڭ الدىن الۋ ءۇشىن جاڭا ۋاكىلەتتى مەملەكەتتىك ورگان - اقپارات جانە كوممۋنيكاتسيا مينيسترلىگىن قۇرۋدى تاپسىرامىن».

پرەزيدەنت جاڭا مينيسترلىكتىڭ قۇزىرىنا كىرەتىن قىزمەتتەردى دە تىزبەلەپ شىقتى.

• قوعامداعى وزەكتى ماسەلەلەردى تەز انىقتاپ، تەز شارا قولدانۋ ءۇشىن ينتەرنەت-رەسۋرستار مەن الەۋمەتتىك جەلىلەردى قوسا العاندا، كەز كەلگەن فورماداعى اقپاراتتىق كەڭىستىككە مونيتورينگ جۇرگىزۋ;
• وزەكتى تاقىرىپتار مەن ماسەلەلەر جونىندەگى قوعامدىق پىكىرلەردى زەرتتەۋ، حالىقتىڭ پىكىرى مەن اقپاراتتىق سۇراۋلارعا ساراپتاما جاساپ، بولجام جۇرگىزۋ;
• مەملەكەتتىك اقپاراتتىق ساياساتتى قولعا الۋ;
• بارلىق مەملەكەتتىك ورگانداردىڭ اقپاراتتىق قىزمەتى مەن بەلسەندىلىگىن باقىلاۋ جانە ۇيلەستىرۋ;
• مەملەكەتتىك اقپاراتتىق تاپسىرىس پەن مەملەكەت بولگەن قارجىنىڭ تيىمدىلىگىن تەكسەرۋ جانە جوسپارلاۋ;
• وتاندىق باق-تى ەكونوميكانىڭ ءبىر سەگمەنتى رەتىندە دامىتۋ ءۇشىن ينۆەستيتسيا مەن يننوۆاتسيا تارتۋ;
• ەلەكتروندى جانە باسپا باق-تاردى قوسا العاندا، اقپاراتتىق قاۋىپسىزدىكتى قامتاماسىز ەتۋ ءۇشىن وتاندىق اقپاراتتىق ونىمدەردىڭ ساپاسىن جاقسارتۋ: ارنالاردىڭ حالىقپەن قارىم-قاتىناسىن جاقسارتۋ.

دەمەك، جۋىق ارادا قۇرىلىپ، جۇمىسىن باستايتىن جاڭا مينيسترلىك اتالعان ماسەلەلەرمەن اينالىساتىن بولادى.

اقپاراتتىق قاۋىپسىز ماسەلەسى كوپتەن بەرى ايتىلىپ كەلەدى. اسىرەسە، رەسەيدىڭ ەل اۋماعىنا تارالاتىن تەلەارنالارى، مەرزىمدى ءباسپاسوزىنىڭ اقپاراتتىق كەڭىستىكتەگى ورنى جانە ودان كەلۋى مۇمكىن قاۋىپ-قاتەرلەر باق ماماندارى مەن ساراپشىلارى ۇدايى كوتەرىپ كەلە جاتقان پروبلەما. ونىڭ ءبىر ايعاعىنداي، جەر ماسەلەسىنە قاتىس قوعامداعى ۇلكەن قارسىلىق كەزىندە «ميتينگىگە شىعاتىندار 150 دوللار الادى» دەپ جالعان اقپارات تاراتقان رەسەيلىك ءبىرىنشى ارنانىڭ قازاقستانداعى ءبولىمى ء«بىرىنشى ەۆرازيا» ارناسىنىڭ ارەكەتى دەۋگە بولادى.

تاعى ءبىر ماسەلە - جاڭا مينيسترلىكتىڭ الەۋمەتتىك جەلىلەردى باقىلاۋعا الۋ ماسەلەسى. بۇل ءوز كەزەگىندە الەۋمەتتىك جەلى ارقىلى كورىنىس تاۋىپ وتىرعان قوعامدىق بەلسەندىلىك پەن ويدى قاتاڭ باقىلاۋعا ۇستاۋعا الىپ كەلمەي مە دەگەن الاڭداۋشىلىق نەگىز بولارى ءسوزسىز.

پرەزيدەنت ايتقان ۇسىنىستاردىڭ ىشىندە «ارنالاردىڭ حالىقپەن قارىم-قاتىناسىن جاقسارتۋ» ماسەلەسى دە بار. تەلەارنالاردىڭ ارزان شوۋمەن رەيتينگ قۋالاپ، اقپاراتتىق-ساراپتامالىق باعدارلاماردى اقساتىپ العانى دا جاسىرىن ەمەس. جالپى، جالاڭ، كوزسسىز، بىرجاقتى ناسيحات قۇرالىنا اينالعان باق بۇل سالاسىندا پروبلەما از ەمەس. ونىڭ ءبارىن جاڭا مينيسترلىك قالاي شەشەتىنىن ۋاقىت كورسەتەدى.

نۇرا ماتاي

Abai.kz