1-ءشى مامىر بىرلىك كۇنىنە وراي گەرمانيانىڭ ميۋنحەن قالاسىندا زۋقا باتىردىڭ 150 جىلدىق مەرەي تويى اتالىپ ءوتتى.  شارانى «ميۋنحەن قازاق مادەنيەت قوعامى» وتكىزدى.

كەزدەسۋگە ميۋنحەندەگى  قازاق، تۇرىك، تاتار، ۇيعىر ۇلتىنىڭ ازاماتتارى مەن قالاداعى تۇرىك ەلشىلىگىنىڭ رەسمي وكىلى ەمىن ۇلكەر جانە ۆەنا مەن انكارا قالالارىناندا قوناقتار كەلىپ قاتىستى.

تۇرىك ەلشىلىگىنىڭ رەسمي وكىلى ەمىن ۇلكەر قۇتتىقتاۋ سوزىندە: «زۋقا قاجى باتىر بولۋىمەن قاتار ءدىني ءبىلىمى دە اسا جوعارى عۇلاما، حالقىنا جول كورسەتكەن ەل باستاعان قوعام قايراتكەرى. بار حالىقتى ءبىر اتانىڭ بالاسىنداي كورىپ قاناتىنىڭ استىنا العان ەل قورعانى» دەدى.

كەيىن ءسوز العان ميۋنحەن قازاق مادەنيەت قوعامىنىڭ جەتەكشىسى يبراھيم اقتەڭىز زۋقا باتىرداي قازاقتىڭ ەركىندىگى ءۇشىن كۇرەسكەن تۇلعانى  دارىپتەۋ ءوز مىندەتتەرى ەكەنىن اتاپ ءوتتى.

ازاتتىق راديوسىندا ۇزاق ۋاقىت قىزمەت اتقارعان، زۋقا باتىردىڭ ۇلكەن ۇلى ءسۇلتانشارىپتىڭ نەمەرەسى تالعات قوسجىگىت زۋقا باتىردىڭ كۇرەس جولىنا توقتالا كەلىپ، سونداي قيىن كەزەڭدە قازاققا پانا بولعان تۇرىك ەلىنە قازاقتاردىڭ ريزاشىلىعىن ءبىلدىردى جانە وسى شارانى ۇيىمداستىرۋشى «ميۋنحەن قازاق مادەنيەت قوعامى» مەن جەتەكشىسى يبراھيم اقتەڭىزگە راحمەتىن ايتتى.

زۋقا باتىر - 1866 جىلى قازىرگى شىعىس قازاقستان وبلىسىنىڭ زايسان اۋدانىندا دۇنيەگە كەلگەن. زۋقانىڭ اكەسى شىعىس وڭىرىنە اسا تانىمال بولعان ءسابيت داموللا ەدى. ارعى اتاسى نۇرمۇحاممەد ابىز. تەكتى اۋلەتتەن شىققان باتىر بابامىز، ورىس وتارشىلدىعى مەن گومينداڭ قىتاي ەزگىسىنە تاپ بولعان قازاق حالقىن ازات ەتۋ جولىندا قازا تابادى. بيىل باتىر بابامىزدىڭ تۋعانىنا 150 جىل تولدى.

ەسكە الۋ شارالارى قازاقستان، گەرمانيا، اۋستريا، انگليا، امەريكا، تۇركيا، قىتاي، موڭعوليا سىندى 10 شاقتى ەلدە اتالىپ وتىلەدى.

جۇماباي ءمادىبايۇلى

اباي-اقپارات