بۇقارا حالىقتىڭ ساۋالىنا جاۋاپ قايتارمايتىن كەيبىر مەملەكەتتىك مەكەمەلەر مەن ونداعى لاۋازىمدى قىزمەتكەرلەردى (شەنەۋنىكتەردى) سوتقا بەرۋگە بولادى دەگەن زاڭ جوباسىن كەشە ءماجىلىس دەپۋتاتتارى پارلامەنت قابىرعاسىندا تالقىلادى،-دەپ حابارلايدى Stan.kz پورتالى.

ەگەر اتالعان ساۋال مەملەكەتتىك قۇپياعا جاتپايتىن مالىمەت بولسا، ونى جاسىرىپ قالعان شەنەۋنىكتەردى جاۋاپقا تارتۋعا بولادى. كەشە «اقپاراتقا قول جەتىمدىلىك» تۋرالى ايتقان دەپۋتاتتار، اتالمىش زاڭ جوباسىنىڭ ىسكە اسىرىلۋ باعىتى تۋرالى باياندادى.

قازىر قازاقستاندىق قوعامدا اقپارات جالپىعا قولجەتىمدى بولۋى كەرەك دەگەن تۇراقتى پىكىر بار. الايدا ءبىزدىڭ زاڭنامانىڭ بارلىق كولەمىندە اقپاراتتىق-قۇقىقتىق كەڭىستىكتەگى احۋالدى انىقتايتىن جۇيە قۇرايتىن ناقتى زاڭنامالىق اكتىلەردى بىرىكتىرەتىن قۇجات جوق ەكەن. مەملەكەتتىك ورگانداردىڭ اقپاراتتىق اشىقتىعى تۋرالى ستاندارتتارعا سايكەس - كەز-كەلگەن ازامات مەملەكەتتىك مەكەمەلەردەن وزىنە قاجەتتى اقپاراتتى سۇراتا الادى. ءتىپتى اتا زاڭدا دا بۇل اتالىپ كورسەتىلگەن ەكەن.

اتالعان قۇجاتقا سايكەس، قازاقستاننىڭ تۇراقتى ازاماتى ەكونوميكادان باستاپ الەۋمەتتىك ماسەلەلەر جانە بيۋدجەتتىڭ ءار تيىنىنا دەيىن قايدا جۇمسالعانىن بىلۋىنە قۇقى بار. بۇل دەموكراتيا وتتەگىسى ىسپەتتى. مۇنداي اقپاراتقا ەركىن قولجەتىمدىلىك - جەمقورلىققا قارسى داۋا بولىپ تابىلادى.

ونىڭ ۇستىنە شەنەۋنىكتەر جۇرتتىڭ دۇرىس ۇقپاعان زاڭ جوبالارى مەن رەفورمالاردى تاپتىشتەپ ءتۇسىندىرىپ بەرۋى ءتيىس. بۇل قۇجات بىلتىر «100 ناقتى قادام» باعدارلاماسى اياسىندا قابىلدانعان بولاتىن.

ال مينيسترلىك، اكىمدىك پەن ءتۇرلى ورگاندار تۇرعىنداردىڭ ساۋالىنا 15 كۇن ىشىندە جاۋاپ بەرۋگە مىندەتتەلىپ وتىر. تالاپتى ورىنداماعان مەملەكەتتىك قىزمەتكەرلەر جاپپاي جازالاناتىن بولادى.

«ەگەر مەملەكەتتىك ورگاندار اشىق اقپاراتتى «قىزمەتتىك اينالىمعا تۇسپەيتىن اقپارات» دەپ شەشىمدەر قابىلداپ بەرمەي جاتسا، وندا وسى ماسەلەنى سوتتا كوتەرىپ، ايىپپۇلدار سالۋعا بارلىق مۇمكىندىكتەر بار»،-دەيدى ءماجىلىس دەپۋتاتى ماۋلەن اشىمباەۆ.

نۇرزات توعجان

Abai.kz