ەلىمىزدىڭ جۇرەگى اتانعان استانادا باسپاناعا قاتىستى قانشاما قاربالاس تىرلىكتەر بار. جىلجىمايتىن مۇلىك اينالاسىنداعى بيزنەس - قىپ قىزىل اقشا. اسىرەسە باسپانانى جالعا بەرۋ - وڭاي تابىس تابۋدىڭ تاپتىرمايتىن كوزى.

البەتتە، جالعا الۋشى ءوزىمىزدىڭ قىردان  كەلگەن باياعى قايمانا قازاق. جالعا بەرۋشى باسپانالاردى امالىن تاۋىپ راسىمدەپ ۇلگەرگەن جەرگىلىكتى استانا تۇرعىندارى، تابىستى كاسىپكەرلەر نەمەسە ءىلىس-تانىستىڭ ارقاسىندا جەڭىلدىكپەن قول جەتكىزگەن بيۋدجەتتىك قىزمەتكەرلەر.

باسپانانى جالعا بەرۋشىلەر ادەتتە كوپ نارسەدەن ۇتىلمايدى. بۇل باسى قاسىندا تۇرماسا بىردەڭەنى ۇرلاپ كەتەتىندەي قاۋىپتى بيزنەس ەمەس، جىلجىمايتىن مۇلىكتى ەشكىم قالتاسىنا سالىپ الىپ كەتكەن جاعداي بولىپ كورمەگەن. دەگەنمەن جالعا بەرۋشىلەر ەسكى «جەتىم بۇرىشتان» قالعان «جارتىلاي قۇداي» پسيحولوگياسىنان ءالى دە ارىلا الماي كەلەدى. پاتەر جالداۋشىنىڭ ءومىرىن قايتا-قايتا كەلىپ تەكسەرۋ، نەگىزسىز تالاپتار قويۋ كادىمگى ادەتكە اينالعان.

دەسە دە وسى قاعيدانى بۇزعان جاعداي استانادا ورىن الدى. جالعا العان پاتەرىن مەزگىلسىز كەلىپ تەكسەرگەنى ءۇشىن جالعا الۋشى ءۇي يەسىن سوتقا بەردى. ءۇي يەسى بلاگودات ەسىمدى ايەل ءىستىڭ وسىنشا ناسىرعا شابارىن كۇتپەسە كەرەك. پاتەر جالداۋشىلاردىڭ ادامي قۇقىقتارىن تاپتاپ ۇيرەنگەنىن ول سوت وتىرىسىندا دا جاسىرعان جوق. «مەنىڭ سويلەگەنىم ۇرىسقان سياقتى، بۇل مەندەگى ادەت» دەپ جاۋاپ بەردى ول سۋدياعا قايمىقپاي. سوت توراعاسى ءىستى ناتيجەسىز جاۋىپ، قىلمىستىق سوتقا بەرۋگە سىلتەمە جاسادى. ويتكەنى ءۇي يەسىنىڭ ارەكەتتەرى قىپ-قىزىل قىلمىسقا جاتادى ەكەن. قر «تۇرعىن ءۇي قاتىناستارى تۋرالى» زاڭدا پاتەر جالداۋشىنىڭ بارلىق قۇقىقتارى قورعالعان. زاڭدا كورسەتىلگەندەي ءۇي يەسى جالداۋشىلاردى مەزگىلسىز مازالاۋعا، قالاي جانە كىمدەرمەن بىرگە ءومىر سۇرەتىنىن تەكسەرۋگە، جالعا الۋ مەرزىمى بىتكەنگە دەيىن قانداي  دا ءبىر ماتەريالدىق شىعىن ءوندىرىپ الۋعا شەكتەۋ قويىلعان.

ال بلاگودات ەسىمدى ءۇي يەسى ءوزىنىڭ ايتۋىنشا ۇنەمى كەز كەلگەن ۋاقىتتا پاتەرىن تەكسەرەدى جانە جاسالاتىن كەلىسىم-شارتتى ءوزى تۇزەدى ەكەن. ايدىڭ ورتاسىندا كەلىپ جانجال شىعارىپ، پاتەر جالداۋشىلاردى قۋىپ شىعۋ ونىڭ ادەتتەگى تىرلىگىنە ۇقسايدى. وسىلايشا ونىڭ بىرنەشە پاتەر جالداۋشىلاردى قۋىپ شىعىپ اقشاسىن قايتارماي قويعانى ءمالىم بولدى. بۇل دەگەنىڭىز كادىمگى «الاياقتىق» جانە «بالاعاتتاۋ» دەپ اتالاتىن قر قىلمىستىق كودەكسىندە جازىلعان ارەكەت. وعان قوسا تابىس تاۋىپ وتىرعان بيزنەسىنە قاتىستى ەشقانداي سالىق تولەمەيتىنى دە نازاردان تىس قالعان جوق. بلاگوداتتىڭ مەملەكەتتىك جەڭىلدىكپەن العان پاتەرىنە ءوزى تۇرماستان، جالعا بەرىپ وتىرعانى استانالىق تۇرعىن ءۇي دەپارتامەنتىنىڭ دە قىزىعۋشىلىعىن تۋدىردى.

بۇل جاعداي پاتەر جالداۋشىلار مەن جالعا بەرۋشىلەر اراسىنداعى كوزگە كورىنبەس كۇرەسكە ۇقسايدى. ايتكەنمەن، پاتەر جالداۋشىنىڭ دا باس كوتەرەر قاۋقارى بار ەكەنىنە ءسۇيسىنۋ كەرەك شىعار.

گۇلجان ءىزتاي

اbai.kz